Së paku 50 persona kanë humbur jetën në një diskotekë në Koçan nga zjarri që ka shpërthyer rreth orës 03:00 të mëngjesit të sotëm, njoftoi Ministria e Punëve të Brendshme të Maqedonisë së Veriut.
Sipas informacioneve jozyrtare, zjarri i cili ka plagosur mbi 100 persona, me shumë gjasa ka rënë për shkak të përdorimit të mjeteve piroteknike apo mosfunksionim në instalimet e ndriçimit, shkruan portali a1.
Siç raportojnë mediat maqedonase, fillimisht ka rënë konstruksioni i çatisë.
Portali plusinfo.mk thekson se objekti ku ndodhet diskoteka më parë ka qenë magazinë qilimash dhe se licenca e klubit të natës i skadon më 24 mars.
Në vendin e aksidentit ndodhet ministri i Punëve të Brendshme Pançe Toshkovski, ndërsa për në Koçan është nisur edhe kryeministri Hristijan Mickoski.
Toskovski pritet të mbajë konferencë për media në orën 9:00.
Shumica e të lënduarve nga zjarri në diskotekën “Puls” në Koçan janë transferuar në Spitalin e Përgjithshëm në Koçan, ku ende po marrin kujdes mjekësor, njoftojnë mediat në Maqedoninë e Veriut.
Mediat sociale kërkojnë 16 persona që ndodheshin në disko gjatë zjarrit
Në rrjetet sociale qarkullojnë emrat dhe përshkrimet e më shumë se 16 personave, familjarët dhe miqtë e të cilëve thonë se kanë qenë të pranishëm në disko “Puls” në Koçan, ku sot herët në mëngjes shpërtheu zjarri, ku mbetën të vdekur 51 persona dhe rreth 100 të plagosur, me kërkesë për të dhënë çdo informacion për vendndodhjen e tyre, transmeton “Kurir” i Shkupit.
Gazeta thekson gjithashtu se është publikuar një listë e të rinjve të shtruar në spitale, pas kërkesave të familjeve për çdo informacion për të dashurit e tyre, të cilët ndodheshin mbrëmjen e djeshme në diskotekën ku ra zjarri.
Zjarri në diskotekë ka rënë rreth orës 03:00 të mëngjesit të sotëm, gjatë një koncerti të grupit DNK, ku sipas informacioneve jozyrtare kanë marrë pjesë rreth 1500 persona.
Në Qendrën Klinike në Shkup është shfaqur lista e të lënduarve, shumë prej të cilëve janë në gjendje të rëndë.
