Presidenti serb Aleksandar Vuçiq tha se sapo ka përfunduar bisedën me presidentin e Republikës Srpska, Milorad Dodik, duke vlerësuar se situata po bëhet gjithnjë e më komplekse.
“Ai është president dhe një burrë trim. Ai nuk ankohet, por situata po vështirësohet. Ne do të merremi me këtë në ditët në vijim”, tha Vuçiq.
Ai ka bërë të ditur se nesër ose pasnesër do të udhëtojë për në Bruksel, ku do të bisedojë me Sekretarin e Përgjithshëm të NATO-s Mark Rutte dhe komisioneren evropiane Marta Kos.
Pas kësaj është planifikuar një takim tjetër në Bruksel me kryeministrin portugez Antonio Costa dhe presidenten e Komisionit Evropian Ursula von der Leyen.
Në fjalimin e djeshëm në seancën e Qeverisë së Serbisë, Vuçiq i bëri thirrje Qeverisë që të organizojë një vizitë në Beograd nga Dodik dhe Stevandiq.
Duke thënë se 24 marsi shënon përvjetorin e bombardimeve të NATO-s në Republikën Federale të Jugosllavisë dhe se më 25 mars do të takohet me zyrtarë evropianë në Bruksel, e më parë më 19 mars me Sekretarin e Përgjithshëm të NATO-s Mark Rutte, ai tha se para kësaj do të dëshironte të takohej me Dodik.
Që do të thotë se Dodik është dashur të shkojë në Serbi, por meqë nuk ka udhëtuar kanë folur në telefon.
Kujtojmë se për Dodikun, si dhe për kryeministrin e RS-së, Radovan Vishkoviq, dhe kryetarin e Asamblesë Kombëtare të RS-së, Nenad Stevandiq, është lëshuar një urdhër-arresti qendror, që do të thotë se u kufizohen lëvizjet dhe se duhet të ndalohen.
