Policia e Kosovës ka njoftuar se ka arrestuar katër persona në Mitrovicë të Veriut të dyshuar për veprën penale “Lëndim i rëndë trupor”.
M.P – 20 vjeçar, L.K – 22 vjeçar, A.S – 23 vjeçar dhe B.D – 29 vjeçar dyshohen për përfshirje në një përleshje që ka ndodhur me datë 17.03.2025 në një kafene në Mitrovicë të Veriut.
Sipas Policisë, arrestimi i të dyshuarve është bërë pas një pune intensive të hetueseve nga Stacioni Policor në Mitrovicë të Veriut, të cilët kanë arritur t’i identifikojnë dhe t’i arrestojnë të dyshuarit.
“Si pasojë e kësaj përleshje, të lënduar kanë mbetur viktimat M.P 33-vjeçar dhe një 27-vjeçare, të cilët kanë pranuar tretman mjekësor dhe ende ndodhen nën përkujdesje mjekësore në Spitalin Rajonal në Mitrovicë Veri. Të gjitha veprimet e ndërmarra i janë paraqitur prokurorit të rastit, ku pas intervistimit të gjithë personave te arrestuar me aktvendim të prokurorit u është caktuar masa e ndalimit për 48 orë”, ka njoftuar Policia e Kosovës.
Tutje Policia e Kosovës thotë se mbetet e përkushtuar në luftimin e dhunës dhe sigurinë e qytetarëve, gjithashtu i inkurajon qytetarët që të raportojnë rastet e ngjashme në mënyrë që të ndërmerren veprimet e nevojshme ligjore.
