Ushtarët amerikanë të caktuar në Komandën Rajonale Lindore të misionit të udhëhequr nga NATO – KFOR, realizuan një kurs trajnimi për shënjestrim në Kampin Bondsteel në Kosovë.
Ky trajnim ka për qëllim të përmirësojë aftësitë e ushtarëve në trajtimin dhe përdorimin e armëve, duke rritur kështu gatishmërinë dhe kapacitetet e tyre luftarake.
Në njoftimin e misionit të NATO-s theksohet se ky kurs është pjesë e misionit të përditshëm të KFOR-it për të siguruar një mjedis të sigurt dhe të qëndrueshëm për të gjitha komunitetet që jetojnë në Kosovë.
KFOR rithekson se vazhdon të zbatojë mandatimin e tij, i bazuar në Rezolutën e Këshillit të Sigurimit të OKB-së, për të kontribuar në sigurimin e lirisë së lëvizjes dhe një ambient paqeje për të gjithë qytetarët e Kosovës.
“KFOR punon ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX) për të mbajtur sigurinë dhe stabilitetin në vend, duke vepruar gjithmonë në mënyrë të paanshme dhe profesionale”, thuhet në njoftimin e misionit të NATO-s në Kosovë.
