Protestuesit turq dolën në rrugë për natën e tretë me radhë, duke kërkuar dorëheqjen e qeverisë për ndalimin e kryebashkiakut të Stambollit Ekrem İmamoğlu.
Njerëzit u mblodhën në Stamboll, Ankara dhe Izmir pavarësisht ndalimit të protestave, njoftuan mediat lokale. Në Stamboll, demonstruesit kërkuan dorëheqjen e qeverisë.
Rreth 100 persona të arrestuar
Policia përdori gaz lotsjellës kundër protestuesve që donin të kalonin bllokadën e policisë, pa një gazetar i PDSH. Ministri i Brendshëm Ali Yerlikaya njoftoi se 97 persona ishin arrestuar në protesta pak para mesnatës.
Presidenti turk Rexhep Tajip Erdogan më parë i quajti protestat “terror në rrugë” dhe akuzoi opozitën se po përpiqet të krijojë “kaos”. “Ne nuk do të pranojmë shkatërrimin e pronës publike dhe trazirat në asnjë rrethanë,” pohoi Erdogan.
İmamoğlu u arrestua të mërkurën, disa ditë përpara se të emërohej si kandidati presidencial i opozitës kryesore, Partia Popullore Republikane (CHP).
Ai akuzohet për terrorizëm dhe korrupsion dhe opozita pretendon se ky është një persekutim politik i konkurrentit të Erdoganit. İmamoğlu është planifikuar të sillet në gjykatë të shtunën.
