600 raste besohet të jenë aktive me tuberkuloz gjatë vitit që lam pas. Krahasuar me rajonin, Kosova ka numrin më të madh të pacientëve me këtë sëmundje.
“Edhe pse për vitin 2024 nuk kemi të dhënat zyrtare, por sipas informacioneve që posedojmë për Klinikën tonë rreth trajtimit të pacientëve me tuberkuloz aktive dhe latente, në nivel vendi mendohet se sillen rreth 600 raste. Poashtu edhe në vitin 2023 kanë qenë 615 raste”, ka thënë në një intervistë dhënë për “Mirëmëngjesi Kosovë” në RTK.
Hoxha ka deklaruar se kur krahasohet me kokë banori, shifrat mbesin më të lartat për vendin tonë.
“Kur e matim me numrin e popullatës të cilën e kemi patjetër se del incidenca mbi 30 raste të reja në 100 mijë banorë, pra është numër mjaft i madh për vendin, duke u krahasuar me vendet përreth, si Shqipëria, Maqedonia, Mali i Zi, Serbia, që të gjitha kanë një incidencë përgjysmë, ndoshta edhe trefish më të ulët se Kosova”, ka thënë Hoxha.
Ai ka thënë se vendet më të varfëra kanë tendencë të pacientëve në numër më të madh me këtë sëmundje. Hoxha ka thënë se kushtet jetësore ndikojnë tejet shumë, teksa ka shtuar se rezultati në Kosovë nuk është i kënaqshëm.
“Kjo sëmundje ka qenë prezente edhe gjatë viteve ’90 dhe 2000. Një nga arsyet ka qenë edhe lufta e fundit, e që me rastin e saj numri i të prekurve me tuberkuloz ka qenë shumë i rritur, në krahasim me shtetet përreth”, ka theksuar ai.
