Dragan Shutanovac është emëruar zyrtarisht si ambasador i Serbisë në Shtetet e Bashkuara të Amerikës, ndërsa Jelena Miliq është tërhequr nga posti i saj si ambasadore e Serbisë në Kroacinë fqinje.Ky informacion është publikuar në Gazetën Zyrtare të Serbisë dhe është nënshkruar nga presidenti serb Aleksandar Vuçiq.
Shutanovac është një ish-lider i Partisë Demokratike (DS) dhe ka shërbyer gjithashtu si Ministër i Mbrojtjes i Serbisë në qeveritë e Vojislav Koshtunicës dhe Mirko Cvetkoviqit.
Në të kaluarën ai ka pasur përplasje të shpeshta me presidentin serb Aleksandar Vuçiq gjatë kohës sa ishte figurë aktive e opozitës, por ka më shumë se katër vjet që është jashtë ngjarjeve ditore politike.
Procedura kërkon që pas konfirmimit të Shutanovacit si ambasador, Serbia të dërgojë një kërkesë për marrëveshje në SHBA. Vetëm pas miratimit të marrëveshjes, në një procedurë që zgjat nga 40 deri në 60 ditë, Shutanovaci do të mund të marrë detyrën e tij si ambasador, rikujton Nova.rs.
Në publik disa herë është thënë jozyrtarisht se Shutanovaci mund të udhëtojë në Amerikë, por ai e ka mohuar.
Miliq u emërua ambasadore e Serbisë në Kroaci në mars të vitit 2022. Misioni i saj diplomatik u karakterizua nga skandale.
Njëra prej tyre ndodhi në fund të janarit kur ajo u largua në mënyrë demonstrative nga pritja tradicionale e Këshillit Kombëtar Serb për Krishtlindjet Ortodokse në Zagreb.
Kjo ishte lëvizja e saj pas një letre të shkruar nga fituesit e çmimit të parë duke falënderuar të rinjtë në Serbi të cilët aluduan për protestat e studentëve dhe thanë se “këto ditë janë mësuar si të fluturojnë dhe si të shkëlqejnë”.
