Të paktën 23 persona kanë vdekur nga zjarret pyjore që vazhdojnë të shkatërrojnë Korenë Juglindore, sipas shifrave të fundit nga Ministria e Punëve të Brendshme dhe Sigurisë së vendit.
Zjarret në pyje janë ndër më të këqijat në historinë e Koresë së Jugut, duke shkaktuar “dëm të paparë” dhe duke tejkaluar të gjitha modelet e parashikuara, tha presidenti i përkohshëm Han Duck-soo.
Mijëra zjarrfikës janë duke luftuar më shumë se një duzinë zjarresh në juglindje të vendit që nga fundjava.
Më shumë se 23,000 njerëz u evakuuan dhe disa objekte kulturore u dëmtuan, duke përfshirë një tempull budist 1,300-vjeçar, i cili u shkatërrua plotësisht.
Në përgjigje të situatës, Han njoftoi të mërkurën se niveli i sigurisë po ngrihej në maksimum dhe deklaroi një “përgjigje të plotë kombëtare”.
“Zjarret pyjore që digjen prej pesë ditësh në Ulsan dhe rajonin Gyeongsang po shkaktojnë dëme të paprecedentë”, tha Han, duke shtuar se ato po përhapen në një mënyrë që “kapërcejnë të gjitha modelet ekzistuese të parashikimit”. Situata e zjarrit po përkeqësohet nga moti i thatë dhe me erë.
Një helikopter zjarrfikës u rrëzua pak pas mesditës së djeshme në malet e qarkut Uiseong, konfirmuan autoritetet. Shkaku i aksidentit është ende nën hetim.
Mijëra zjarrfikës dhe rreth 5000 personel ushtarak janë vendosur në terren në përpjekje për të frenuar zjarret e shumta dhe janë vendosur gjithashtu helikopterë nga ushtria amerikane e vendosur në Kore.
Agjencia Kombëtare e Zjarrfikësve ngriti gjendjen e gatishmërisë në nivelin më të lartë për reagimin ndaj zjarrit të martën.
Zjarret në Korenë e Jugut janë relativisht të rralla dhe vdekjet që lidhen me to janë edhe më të rralla.
Zjarret në pyje janë relativisht të rralla në Korenë e Jugut dhe vdekjet që lidhen me to janë edhe më të rralla. Por zjarret që kanë shpërthyer ditët e fundit kanë marrë 23 jetë njerëzish dhe tashmë janë më vdekjeprurësit në historinë e vendit.
Rreth 17,000 hektarë pyje janë shkatërruar gjithashtu, duke i bërë këto zjarre të tretat më të mëdha në historinë e Koresë së Jugut për sa i përket zonës së prekur.
Zjarri që shpërtheu në qytetin Uiseong shkatërroi tempullin Gounsa, i ndërtuar në vitin 618, i cili ishte një nga më të mëdhenjtë në provincë.
Një strukturë budiste nga dinastia Joseon (1392–1910), e shpallur një thesar kombëtar, u shkatërrua gjithashtu, konfirmuan autoritetet pyjore.
Zjarret fillimisht shpërthyen të premten e kaluar në qarkun Sancheong në juglindje të vendit, më pas u përhapën në qytetet fqinje të Uiseong, Andong, Cheongsong, Yeongyang dhe Yeongdeok.
