Bedri Hamza, që ka qenë kandidat i PDK-së për kryeministër në zgjedhjet e 9 shkurtit, parti që u rendit e dyta për nga votat e numri i deputetëve, ka thënë se është i gatshëm që të nisë negociatat për qeverinë e re, por, fillimisht tha se do të presin partinë fituese të zgjedhjeve që brenda afateve ta bëjnë këtë.
Por, sipas tij, nëse partia fituese nuk arrinë brenda afateve t’i jap vendit institucione të reja, atëherë ai dhe PDK-ja janë të gatshëm që Kosovës t’i japin një qeveri të re.
Ka treguar se është në biseda me partitë tjera që deri tash kanë qenë në opozitë, por tha se ende nuk kanë arritur në fazën se si do të duket formula qeverisëse.
“ Tash jemi në një fazë ku vendi duhet t’i ketë institucionet. Unë besoj duke respektuar kushtetutën, ligjet, partia e parë do të provojë në kohë e pa vonesa për t’i krijuar institucionet, edhe konstituimin e Kuvendit edhe Qeverinë. “Bazuar në situatën gjeopolitike dhe ekonomike, në të cilën ndodhet vendi, Kosova ka nevojë për institucione. Në rast se partia e parë nuk arrin brenda afateve ligjore dhe kushtetuese unë jam i gatshëm si kandidat për kryeministër nga Partia Demokratike e Kosovës t’i marr përgjegjësitë për krijimin e Qeverisë. Jam në komunikim me partitë opozitare, që ne ta krijojmë qeverinë dhe t’ia japim institucionet vendit”, tha ai.
Hamza, tregoi se arsye pse ka dhënë dorëheqje nga pozita e deputetit që e fitoi me 9 shkurt. Ai tha se mbanë pozitën e kryetarit të Komunës së Mitrovicës dhe komuna si shkak i kësaj do të shkonte në zgjedhje, e sipas tij, do të ishte e padrejtë që brenda 6 muajsh, komuna të shkonte dy herë në zgjedhje.
“Por, kjo nuk më ndalon që unë të punoj dhe e kam mbështetjen e plotë të PDK-së, për bisedat me parti tjera për ta krijuar Qeverinë e Republikës së Kosovës, nëse radha kalon tek ne. Prandaj çdo vonesë është e paarsyeshme dhe e dëmshme për vendin”, theksoi ai.
Hamza tha se gjatë fushatës ka qenë kundër vijave të kuqe dhe ato nuk i preferon.
“Sa i përket bisedave, po jemi në biseda dhe fatbardhësisht asnjë barrierë në komunikim me asnjë parti politike apo plitikan në Kosovë nuk ekziston. Jam i gatshëm me të gjithë të bisedoj. Jemi në biseda edhe me LDK, edhe AAK-Nisma edhe me subjekte tjera. Nuk kemi arritur në fazën si do të duket formula qeverisëse”, tha ai.
Hamza, tha se radha dihet, PDK-ja është partia e dytë, i ka 24 deputetë.
“Asnjëherë në tavolinë nuk kemi pasur temë se si do të duket qeveria . Radha dihet dhe mbi bazën e kësaj do të diskutojmë”, tha Hamza në konferencën para gazetarëve, një ditë pasi u certifikuan rezultatet e zgjedhjeve nga KQZ-ja.
