Shkruan: Safet KRIVAÇA
Nëse LDK, nuk i bashkohet VV-së, nuk do të ketë qeveri Kurti3, përveç nëse i bashkohet Lista Serbe dhe peshkimi në ndonjë parti tjetër.
Rrethanat që po zhvillohen aktualisht, nga ajo qė mund të lexohet mes rreshtave lë të nënkuptojë se Lumir Abdixhiku është i pakontestuar në veprimet e rrëshqitjes kah Kurti dhe këtë e dëshmojnë disa deklarata si e Anton Çunit se „LDK nuk ka vija të kuqe për formimin e qeverisë“.
Njejtë ka lënë kuptime nëntekstuale në debate edhe Lutfi Haziri i cili e ka përtypur një sinjal që i thotë po Kurtit.
Një deklarim bindës i Abdixhikut gjatë fushatës për vijë të kuqe mes LDK-së dhe VV-së dhe një devijim i tashëm i tij për ta bërë qeverinë Kurti3, dëshmon dyfytyrësi ndaj elektoratit të kësaj partie që mund t‘i hakmerret në zgjedhjet e radhës, përfshirë edhe zgjedhjet lokale në tetor.
Kur thotë Abdixhiku se nuk i ka fituar votat e qytetarëve, prandaj duhet qëndruar në opozitë, krahasuar me atë që e thotë se LDK e bën qeverinë me opozitën vetëm nëse e merr postin e Kryeministrit, ky është argumenti më i plotë se ai do ia bëjë qeverinë Kurtit.
Pra, Kurtit i bëhet qeveria edhe pa ia dhënë Abdixhikut kryeministrin, ndërsa opozita mund ta bëjë qeverinë vetëm duke ja dhënë kryeministrin, kjo e shpërfaq qasjen diskursive të kreut të LDK-së karshi sinqeritetit elektoral, por ne po flasim gjithnjë konform rrethanave që po shihen te kjo parti., tash për tash.
Argumentet se edhe Lista Serbe nuk përjashtohet nga bërja e qeverisë rrjedh nga dy fakte të kësaj natyre:
Lista serbe e kishte votuar projekt buxhetin e qeverisë Kurti dhe po e njëjta e kishte votuar me disa deputetë Vjosa Osmanin për presidente, në rrethana kur Kurti fliste vazhdimisht se Listën Serbe e kishte sjellë në Kuvend PDK.
Përtej të gjithave, duke u nisur nga gjendja aktuale e zhvillimeve politike në vend, opozita nëse do që ta shmang matematikën e Kurtit dhe manovrimet nëpër LDK, duhet t‘ia besoj Abdixhikut kryeministrin dhe ta rrëzojë botëkuptimin e qeverisjes së dëmshme.
PDK dhe LDK, nuk kanë dallime të theksuara programore dhe kanë mendësi zhvillimore për makro ekonomi dhe investime për rritjen e mirëqenies sociale dhe së bashku mund ta harmonizojnë një program qeverisës që përmirëson jetën qytetare me veprime ligjore në rritje pagash publike dhe pensionale dhe skema tjera për veteranët dhe familjet e dëshmorëve.
