Kryetari i Komunës së Prishtinës, Përparim Rama, ka vizituar sot Qendrën për trajtimin e qenve endacakë. Ai tha se po vazhdon angazhimi për menaxhimin e kësaj çështjeje, por tha se kjo është një detyrë e vështirë, veçanërisht, sipas tij, kur përballen me mungesë të mbështetjes nga qeveria.
Tutje, siç bëhet e ditur në komunikatë, sipas përgjegjësisë ligjore, komuna ka detyrimin vetëm kapjen dhe trajtimin e qenve dhe kthimin e tyre në rrugë, më pas.
“Mirëpo, duke marrë parasysh rrezikun dhe pasojat nga qentë endacakë, kryeqyteti ka ndërmarrë hapa shtesë duke investuar në krijimin e “Qendrës për trajtimin e qenve endacakë”, me qëllim që: qentë të mos kthehen më në rrugë dhe të mos rrezikojnë qytetarët, të trajtohen në mënyrë profesionale dhe humane, duke siguruar që nuk do të keqtrajtohen ose eliminohen, të krijohet një sistem i qëndrueshëm dhe i sigurt për trajtimin dhe adoptimin e qenve endacakë”, thuhet tutje në komunikatë.
Si proces e kanë quajtur të gjatë dhe kompleks, i cili, sipas tyre, ka kërkuar kohë.
“Por sot mund të themi me krenari se: Prishtina është qyteti i vetëm në Kosovë që ka një qendër funksionale për qentë endacakë, ku ata trajtohen dhe strehohen deri në adoptimin e tyre nga dashamirës të kafshëve. Për më tepër, ekipet tona monitorojnë adoptuesit për t’u siguruar që qentë po marrin kujdesin e duhur”.
kanë bërë të ditur se janë ngritur 23 pika ushqyese, një përmirësim i ndjeshëm krahasuar me vetëm 5 sa ishin në vitin 2021 e janë trajtuar 4 mijë qen endacakë, e që sipas tyre, në krahasim me qeverisjen e kaluar për 8 vjet ishin trajtuar vetëm 500 qen endacakë .
“Sistemi i ri për menaxhimin e qenve endacakë përfshin kapjen, trajtimin, sterilizimin, strehimin dhe adoptimin, duke siguruar një qasje humane. Sot kemi adoptuesin e 1,000-të, një moment i rëndësishëm në përpjekjet tona për të siguruar familje dhe përkujdesje të qëndrueshme dhe afatgjatë për qentë endacakë” , thuhet në komunikatën e Komunës së Prishtinës rreth kësaj çështjeje.
