Mbrojtja e të akuzuarve në rastin Thaçi dhe të tjerët duhet ta dorëzojë mocionin brenda dhjetë ditëve nga mbyllja e paraqitjes së provave prej Prokurorisë. Kjo, bazuar në rregullën 130 të Rregullores së Procedurës dhe të Provave, pala mbrojtëse menjëherë duhet të informojë trupin gjykues mbi mundësinë e dorëzimit të mocionit për rrëzimin e ndonjë pike apo të gjitha pikave të aktakuzës, varësisht se si e vlerëson mbrojtja një gjë të tillë.
Avokati Ardian Bajraktari tha se nëse aprovohet propozimi i palës mbrojtëse, më pas në fazën pasuese mbrojtja duhet të ofrojë prova dhe dëshmitarë përmes të cilave synohet të rrëzohen pika të tjera të akuzës.
“Në fakt, faza pasuese pikërisht këtë synim e ka, që pikat tjera të aktakuzës të përpiqet t’i argumentojë përmes pikëpamjes përkatësisht dëshmitarëve dhe ofrimit të provave përmes të cilave natyrisht që do të rrëzohen këto pikat e akuzës”, tha Ardian Bajraktari, avokat.
Astrit Kolaj nga Instituti i Kosovës për Drejtësi tha se bazuar në analizat e IKD-së, ekipet mbrojtëse të akuzuarve duhet ta shfrytëzojnë mundësinë për paraqitjen e mocionit, qoftë për rrëzimin e ndonjë akuze brenda aktakuzës.
“Mund të jetë kjo apo pjesa tjetër ku ekipet mbrojtëse kanë vërejtur që ndonjë pjesë e akuzës brenda aktakuzës nuk ka mundur të vërtetohet nga prokuroria me dëshmitarët që ajo ka paraqitur dhe mund të jetë si element që ato nuk do të preken në këtë pjesë me anë të mocionit”, tha Astrit Kolaj, hulumtues në IKD.
Ndaj vendimit me të cilin trupi gjykues rrëzon aktakuzën apo ndonjë nga pikat e saj, Prokuroria brenda afatit prej 10 ditësh ka të drejtën të parashtrojë ankesë. Kurse mbrojtja nuk ka të drejtë të ankohet ndaj vendimit me të cilin refuzohet kërkesa për rrëzimin e aktakuzës ose ndonjë prej pikave të saj.
Ende nuk dihet se sa dëshmitarë saktësisht do t’i kenë ekipet mbrojtëse, ndërsa zyra e viktimave, asaj që merr vesh RTK, pritet t’i ketë deri në tre dëshmitarë.
