Nënkryetarja e Kuvendit të Republikës së Kosovës, Saranda Bogujevci, bëri homazhe dhe mori pjesë në Akademinë përkujtimore që u mbajt sot në Klinë për tetë martirët, të vrarë në vitin 1999, trupat e të cilëve u gjetën para disa ditësh në fshatin Bishtazhin të Gjakovës.
Në Akademinë përkujtimore fillimisht një fjalë rasti mbajti kryetari i Komunës së Klinës, Zenun Elezaj.
Nënkryetarja Bogujevci theksoi se në ditët si kjo kujtojmë rrugëtimin e vështirë të popullit tonë, me përplot dhembje dhe sakrifica në luftën me Serbinë, agresorin i cili vrau dhe masakroi civilë të pambrojtur, burra, gra, pleq e fëmijë. Serbia, shtoi nënkryetarja Bogujevci, edhe pas këtyre viteve nuk jep përgjegjësi për krimet dhe gjenocidin ndaj popullit shqiptar.
Bogujevci tha se dëshmorët dhe martirët janë amaneti më i çmuar i Kosovës.
“Me emrat e atyre në mendje ndërtojmë të ardhmen për të cilën ata dhanë jetën. Andaj sot në zemrat tona, përveç pikëllimit dhe dhembjes së madhe, mbajmë edhe fuqinë dhe dinjitetin e lartë për sakrificën e martirëve dhe për historinë tonë të dhimbshme, por edhe të lavdishme”, tha ajo.
Në akademinë e organizuar nga Komuna e Klinës fjalë rasti mbajtën edhe përfaqësuesi i Presidencës së Kosovës, Ismet Krasniqi, kryetari i Komisionit Qeveritar për të Pagjeturit, Andin Hoti, kryetari i Shoqatës së të Zhdukurve për Komunën e Klinës, Zeqir Morina dhe përfaqësuesi i familjeve të personave të pagjetur, Ramë Manaj.
Pas homazheve dhe akademisë përkujtimore me ceremoni ushtarake trupat e tetë martirëve u varrosën në fshatin Grabanicë të Klinës.
