Organizata e Veteranëve të Luftës së UÇK-së, Shoqata e Invalidëve të Luftës dhe Shoqata e Familjeve të Dëshmorëve përmes një postimi në Facebook kanë njoftuar se nuk do të marrin pjesë në asnjë organizim të përbashkët me Qeverinë e Kosovës për Ditën e Çlirimit.
Shoqatat kanë theksuar se ky vendim është marrë si shprehje e qëndrimit kundër “qasjes përbuzëse dhe mosrespektuese” që, sipas tyre, ka treguar kjo qeveri.
“Këtë vendim e kemi marrë si shprehje të qëndrimit tonë të qartë kundër qasjes përbuzëse dhe mosrespektuese që kjo qeveri, e udhëhequr nga Kryeministri Albin Kurti, ka treguar ndaj kategorive të dala nga lufta që nga ardhja e saj në pushtet”, thuhet në njoftim.
“Ftesës për pjesëmarrje i themi JO.Respekti për sakrificën dhe kontributin për liri nuk shprehet me fjalë, por me vepra”, potencohet në fund.
