ATSH
Kryeministri Edi Rama deklaroi sot se udhëheqësit e kontinentit europian do të jenë në Tiranë më 16 maj në Samitin e Komitetit Politik Europian.
“Jemi duke u përgatitur për Samitin e Komitetit politik europian që do të bëhet në Tiranë, më 16 maj, ku do të vijnë të gjithë udhëheqësit e kontinentit që nga Britania te Azerbajxhani, nga Suedia te Turqia për të trajtuar temat e këtij samiti të radhës”, deklaroi Rama.
Në konferencën e përbashkët me Përfaqësuesen e Lartë për Politikën e Jashtme dhe Sigurisë së Bashkimit Europian dhe zv.presidenten e KE-së Kaja Kallas, e cila po zhvillon sot një vizitë zyrtare në Tiranë, Rama tha se kjo është diçka e jashtëzakonshme për Shqipërinë dhe rajonin.
“Kjo është diçka e jashtëzakonshme për Shqipërinë dhe e jashtëzakonshme për rajonin. Natyrisht ka një arsye se pse ndodh në Shqipëri. Unë besoj se është një vlerësim i madh por njëkohësisht edhe një përgjegjësi e madhe për ne si aktorë këtu, në këtë rajon që është gjithmonë e më i rëndësishëm për BE-në“, shtoi Rama.
