Kryetari i Lidhjes Demokratike të Kosovës, Lumir Abdixhiku ka pritur në takim në selinë qendrore ambasadorin e Gjermanisë në Kosovë, Jorn Rohde.
Abdixhiku ka njoftuar se kanë diskutuar për zhvillimet e fundit politike në vend si dhe për qëndrimet e Lidhjes Demokratike të Kosovës lidhur me këto çështje.
“Me theks të veçantë, fola për nevojën urgjente për heqjen e masave ndëshkuese të vendosura nga Bashkimi Evropian ndaj Kosovës, duke theksuar se këto masa po ndikojnë drejtpërdrejt në zhvillimin ekonomik të vendit dhe në mirëqenien e qytetarëve tanë. Bëra dhe thirrje për rishqyrtim të këtij vendimi, në mënyrë që qytetarët e Kosovës të mos mbajnë barrën e zhvillimeve politike”, ka shkruar ai në Facebook.
Abdixhiku ka thënë se i ka uruar Rohdes koalicionin e ri qeverisës në Gjermani, duke besuar në vazhdimin e bashkëpunimit të ngushtë dhe të frytshëm ndërmjet vendeve.
