Kryeministri në detyrë, Albin Kurti, e ka cilësuar rrëfimin e të mbijetuarit të dhunës seksuale, Ramadan Nishorit, si thirrje për mbështetje sociale ndaj kësaj kategorie të prekur në luftën e fundit të Kosovës.
“Me kurajë të jashtëzakonshme, sot, Ramadan Nishori theu heshtjen dhe u bë zëri i parë publik i burrave të mbijetuar të dhunës seksuale gjatë luftës. Kjo është një thirrje e fuqishme për shoqërinë që të mbështesë edhe burrat e tjerë të mbijetuar, të cilët vazhdojnë të përballen me paragjykime dhe vështirësi të shumta në kërkimin e të drejtave që u takojnë”, ka shkruar ai.
Kurti më tej ka thënë Qeveria e Kosovës shpreh solidaritetin e plotë për ta, teksa ka njoftuar për zgjatje të periudhës së aplikimit për marrjen e statusit shtetëror.
“Në këtë ditë simbolike, në përputhje me ligjin, po zgjasim periudhën e aplikimit në Komisionin Qeveritar për verifikimin dhe njohjen e statusit të të mbijetuarve të dhunës seksuale gjatë luftës, me synimin që asnjë e mbijetuar dhe i mbijetuar të mos mbetet pa mundësinë për të kërkuar njohjen dhe mbështetjen që meriton”, ka njoftuar Kurti.
Më tej ai ka thënë se sot nderohet Marte Tunajn, Vasfije Krasniqi Goodman, Shyrete Tahiri Sulimanin për guximin e tyre për dëshmi të krimit të Serbisë në Kosovë.
“Dhuna seksuale është përdorur sistematikisht nga Serbia si mjet lufte në Kosovë gjatë viteve 1998 – 99. Pas 23 vitesh pandëshkueshmëri, në korrik të vitit 2021, u shënua një hap drejt drejtësisë, me dënimin e parë të kriminelit të luftës Zoran Vukotiq për dhunën seksuale ndaj një gruaje shqiptare në Vushtrri. Këto krime nuk parashkruhen e as nuk falen”, ka thënë ai.
