Kryetari i Bashkësisë Islame të Bosnje dhe Hercegovinës, Husein Kavazoviq, pas një vizite që pati në Kosovë, ku takoi kryeministrin në detyrë të Kosovës, Albin Kurti, ka thënë se shqiptarët e Kosovës dhe boshnjakët ndajnë fatin e njëjtë në shumë sfida me shumë të panjohura, teksa shfaqi shpresën në bashkimin e forcave në zgjidhjen e këtyre sfidave.
Reisul ulema Kavazoviq, për mediat boshnjake, tha se ishte një vizitë e mirë dhe se në takimin me kryeministrin Kurti pati një bisedë të këndshme.
“Kryeministri Kurti është një politikan i madh, por, para së gjithash, edhe njeri i madh. Njeri që i kupton marrëdhëniet në rajon, që di se sa e rëndësishme dhe domethënëse është që Bosnja e Hercegovina dhe Kosova të lidhen mes vete, që boshnjakët dhe shqiptarët ndërmjet vete të ndërlidhen dhe kjo me siguri që në të dy anët, në këtë periudhë, të jetë prioritet kyç, të paktën sa na takon neve, si bashkësi islame, në këtë moment, boshnjakët dhe shqiptarët ndajnë fatin e njëjtë në shumë sfida me shumë të panjohura para nesh, por që shpresojmë që të jemi të vetëdijshëm që të bashkojmë forcat që t’i zgjidhim sfidat sa më lehtë”, ka deklaruar kryetari i Bashkësisë Islame të Bosnje dhe Hercegovinës, Husein Kavazoviq.
