Shtetet e Bashkuara duket se i kanë zbutur kërkesat ndaj Ukrainës për të paguar ndihmën e dhënë gjatë luftës me Rusinë.
Bloomberg News e raportoi këtë , duke cituar “burime të informuara”.
Bloomberg News raporton se gjatë raundit të fundit të bisedimeve mbi një marrëveshje ekonomike midis Ukrainës dhe Shteteve të Bashkuara në Uashington javën e kaluar, administrata e Presidentit Donald Trump uli vlerësimin e kostos së ndihmës që Shtetet e Bashkuara i kanë ofruar Kievit që nga fillimi i pushtimit të plotë të Rusisë në Ukrainë nga rreth 300 miliardë dollarë në rreth 100 miliardë dollarë.
Presidenti amerikan Donald Trump po kërkon një marrëveshje mineralesh me Ukrainën, si pjesë e përpjekjeve për t’i dhënë fund luftës së Rusisë kundër Ukrainës. Trump gjithashtu e sheh marrëveshjen si një mënyrë për të rikuperuar miliarda dollarët e shpenzuara për ndihmën ushtarake për Kievin, edhe pse kjo ndihmë nuk ishte një hua.
Presidenti ukrainas Volodymyr Zelensky tha të martën se bisedimet me Shtetet e Bashkuara mbi një marrëveshje për mineralet kanë qenë “pozitive” dhe se priten më shumë takime.
Në mars, administrata Trump propozoi një marrëveshje të re, më ambicioze për mineralet me Ukrainën. Sipas kushteve të paraqitura, Ukraina do të jetë e detyruar të drejtojë të gjitha të ardhurat nga nxjerrja e burimeve natyrore nga ndërmarrjet shtetërore dhe private në territorin e saj në një fond të përbashkët investimi. Si përgjigje, Kievi kërkon që Ukrainës t’i jepet garanci sigurie kundër sulmeve të reja nga Rusia.
