Hajdutët gërmuan nëpër një mur betoni për të hyrë në një dyqan bizhuterish në Los Anxhelos, duke nxjerrë mallra me vlerë të paktën 10 milionë dollarë — duke përfshirë orë, varëse, zinxhirë ari dhe sende të tjera, tha policia.
Grabitja ka ndodhur rreth orës 21:30. Të dielën në dyqanin Love Jewels në Broadway Street, në zemër të distriktit të njohur për dyqanet e tij të bizhuterive, tha oficeri i policisë David Cuellar i Departamentit të Policisë së Los Anxhelosit, sipas AP.
Hetuesit shqyrtuan pamjet e mbikëqyrjes që tregonin të dyshuarit duke hyrë në dyqan përmes një vrime të madhe që shpuan nga ndërtesa ngjitur, tha ai.
“Ata gërmuan nëpër shtresa të shumta betoni për të arritur në objektiv,” tha Cuellar të martën.
Një numër i panjohur i të dyshuarve u arratisën nga e njëjta vrimë dhe u larguan me një kamionçinë më të ri Chevrolet, shtoi ai. Grabitja nuk u zbulua derisa punonjësit mbërritën në punë të hënën në mëngjes.
Sipas vlerësimeve fillestare, u vodhën mallra me vlerë 10 milionë dollarë, tha Cuellar, duke vënë në dukje se kjo shifër mund të ndryshojë. Pronari i tha agjencisë AP se humbja ishte afër 20 milionë dollarë dhe se ata nuk kishin asnjë sigurim. Alarmi nuk ra dhe kamerat e vëzhgimit të dyqanit u fikën.
Në dyqan të martën, punëtorët mbuluan një vrimë në mur me fletë metalike, riparuan dëme të tjera dhe pastruan vitrinë e përmbysur dhe kutitë e shpërndara. Janë thyer dy kasaforta të mëdha dhe në to ndodheshin të gjitha sendet që kishin në dyqan.
Klientët dhe miqtë erdhën për të shprehur keqardhjen e tyre, madje disa kërkuan të blinin diçka.
Faqja e internetit Love Jewels liston artikuj të tillë si një zinxhir ari të verdhë 14 karatësh për 1200 dollarë, një palë vathë në formë zemre për 200 dollarë dhe një varëse kryq ari për 550 dollarë. Pamjet në rrjetet sociale të dyqanit tregojnë kuti xhami të mbushura me unaza, orë dhe gjerdan.
