Policia ka theksuar se një rast i përdorimit të armëve zjarri dhe mbajtjes pa leje të tyre është regjistruar në orët e para të mëngjesit të sotëm në Kashtanjev të Shtërpcës.
Sipas Policisë së Kosovës, ‘rreth orës 00:40, stacioni policor në Shtërpcë ka pranuar informacione për të shtëna armësh në këtë zonë. Dy njësi patrulluese janë nisur menjëherë në drejtim të vendngjarjes, ku kanë hasur një grup prej gjashtë personash që po qëndronin për piknik’.
Gjatë kontrollit në terren, policia ka identifikuar dy persona të dyshuar, D. F. (40 vjeç) dhe U. A. (25 vjeç), të dy meshkuj kosovarë, të cilët dyshohet se kishin përdorur armët.
“Tek të dyshuarit janë gjetur dhe konfiskuar: Një pushkë gjahu me 3 fishekë dhe 5 gëzhoja, një revole me 2 karikatorë dhe 23 fishekë, një revole tjetër me 1 karikator dhe 5 fishekë, dy sopata”, thekson policia.
Të dyshuarit janë shoqëruar në stacionin policor në Shtërpcë për intervistim, dhe me vendim të prokurorit të shtetit janë liruar në procedurë të rregullt, ndërsa rasti mbetet nën hetime.
