Papa Françesku, emri i vërtetë i të cilit është Jorge Mario Bergoglio, ka lindur në vitin 1936 në Buenos Aires dhe është rritur në kryeqytetin e Argjentinës dhe si të gjithë bashkatdhetarët e tij ishte një tifoz futbolli.
Ai ishte një mbështetës i San Lorenzos dhe pasi u bë kreu i Kishës Katolike në vitin 2013, klubi i Buenos Aires vendosi të luante me fanella me foton e tij dhe mbishkrimin “Ne lutemi për ju, lutuni për ne”.
Pas vdekjes së Papës, në internet po qarkullon një kartë anëtarësimi që dëshmon se ai ishte anëtar i San Lorenzos, klubi i katërt më i njohur argjentinas dhe një nga “Big Five”.
“Big Five” është termi i përdorur për pesë klubet më të mëdha të futbollit të Argjentinës, të cilat përfshijnë Boca Juniors, River Plate, Independiente, San Lorenzo dhe Racing.
Papa Françesku ishte një nga 4.2 milionë tifozët e San Lorenzos, një shifër që e rendit klubin të katërtin për nga popullariteti në Argjentinë pas Boca Juniors, River Plate dhe Independiente.
