Sot, në Drejtorinë Qendrore të Shërbimit Korrektues të Kosovës, Drejtori i Përgjithshëm, Ismail Dibrani, priti një grup studentësh nga Belgjika, të cilët ndodhen në Kosovë përmes një programi bashkëpunimi me Universitetin e Prishtinës.
Ky takim kishte për qëllim mirëpritjen e studentëve dhe informimin e tyre rreth funksionimit të Shërbimit Korrektues të Kosovës, njofton SHKK.
Në njoftim thuhet gjithashtu se gjatë këtij takimi, studentët dhe profesorët udhëheqës u njohën nga afër me organizimin, funksionimin dhe sfidat me të cilat përballet Shërbimi Korrektues i Kosovës. Profesorët shprehën mirënjohjen e tyre për mikpritjen dhe mbështetjen e ofruar për studentët gjatë periudhës së programit praktik.
Studentët do të fillojnë praktikën e tyre më 29 prill 2025, e cila do të zhvillohet në Qendrën Korrektuese të Lipjanit (QKL) dhe në Qendrën Edukuese të Korrektimit të Lipjanit (QEKL). Ata do të shoqërohen nga profesorët e tyre gjatë ditës së parë të praktikës.
Ky program bashkëpunimi ndërmjet institucioneve arsimore të Belgjikës dhe Universitetit të Prishtinës, me mbështetjen e Shërbimit Korrektues të Kosovës, përfaqëson një hap të rëndësishëm në nxitjen e shkëmbimeve ndërkombëtare dhe zhvillimin profesional të studentëve në fushën e drejtësisë penale dhe korrektimit.
