Partia Liberale e Kanadasë, e udhëhequr nga kryeministri Mark Carney, është në rrugën e duhur për të fituar zgjedhjet federale, raportojnë mediat kanadeze, pas një fushate të shënuar nga provokime dhe tarifa nga Presidenti i SHBA-së Donald Trump. Votat janë ende duke u numëruar dhe rrjetet partnere të CNN, CTV dhe CBC, parashikojnë se Liberalët do të fitojnë vende të mjaftueshme për të formuar një qeveri të re.
Ndërsa votat ende po numërohen, CBC News thotë se është shumë herët për të thënë nëse qeveria e re do të jetë një qeveri shumice apo pakice – 172 vende janë të nevojshme për një qeveri shumice.
Lideri i Partisë Konservatore, Pierre Poilievre, mbajti një fjalim nga selia e partisë së tij në Ottawa.
“Me mirënjohje të thellë qëndroj para jush sot në këtë moment historik zgjedhor”, fillon Poilievre fjalimin e tij drejtuar mbështetësve.
Ai falënderoi gruan, familjen dhe mbështetësit e Partisë Konservatore, duke thënë: “Do të jem i nderuar të vazhdoj të luftoj për ju dhe të jem avokati juaj në të ardhmen”, duke e bërë të qartë se nuk do të japë dorëheqjen pavarësisht humbjes në zgjedhje.
Poilievre vëren se partia e tij “nuk arriti të kalonte vijën e finishit” këtë mbrëmje, duke shtuar se “ndryshimi është i nevojshëm, por i vështirë për t’u arritur”.
“Duhet të nxjerrim mësime nga rezultati i sonte në mënyrë që të arrijmë një rezultat edhe më të mirë herën tjetër kur kanadezët të vendosin përsëri për të ardhmen e vendit”, thotë ai. Sipas tij, kanadezët zgjodhën një “qeveri shumë të hollë minoritare”. Ai e përgëzoi fituesin.
Një nga sfidat më të mëdha për kryeministrin e ardhshëm të Kanadasë, dhe sipas parashikimeve të CBC-së, ky do të jetë liberali Mark Carney, do të jetë menaxhimi i marrëdhënieve me presidentin e SHBA-së.
Pra, a e dimë se kush dëshiron Donald Trump të jetë fitues?
Trump nuk ka folur që kur CBC News parashikoi një fitore të Liberalëve. Por muajin e kaluar ai i tha Fox News: “Do të preferoja të punoja me një liberal sesa me një konservator” dhe “mendoj se në fakt është më e lehtë të punosh me një liberal”.
Ai shtoi gjithashtu se nuk i intereson shumë se kush fiton.
