Shkruan: Agim ALIQKAJ
Kundër propozimi i menjëhershëm me njëfarë Qeverie të tranzicionit nga ana e z. Abdixhiku, përveç titullit bombastik “nacionale dhe unifikuese”, nuk ka asnjë vlerë tjetër. Këto qeveri krijohen vetëm në kriza të jashtëzakonshme dhe efekti i tyre është minimal, ku punohet keq ose nuk punohet fare dhe fajtorë janë gjithmonë të tjerët. Pra janë qeveri iluzore të krijuara prej zorit. Nuk ka dilema, se ky është më shumë një mashtrim, sepse z. Abdixhiku e din fare mirë se një gjë e tillë do të ishte e papranueshme për VV-në, me vota dyfish më shumë se LDK-Ja. Ftesa e tij të gjitha partive parlamentare është tentim i kotë që nga një humbës i zgjedhjeve të shndërrohet në lider të “unifikimit”. Por, qëllimi i tij kryesor është për ta zhvendosë fajin nga vetja te z. Kurti duke ju frikuar dënimit nga elektorati. Mjerisht, arsyeja e vërtetë për situatën e krijuar është krejtësisht tjetër. Përderisa KM Kurti qeverisjen e vendit e bazon te mbështetja nga populli, krerët e opozitës përpjekjet e veta për pushtet i bazojnë te serviliteti ndaj ndërkombëtarëve dhe për më keq bashkëpunojnë me përkrahës të interesave serbe”. Kohët e fundit shumë eksponent të opozitës janë duke bërë përpjekje ta rehabilitojnë organizatën armiqësore “Lista srpska”. Ata nuk e kanë të qartë se koalicioni me listën serbe do të thotë kthim të Serbisë në Kosovë dhe kjo për popullin e Kosovës është vija e kuqe, e cila nuk mund të kalohet. Nëse opozita, e shtyrë nga oligarkët, ndërkombëtarët pro-serb dhe mediat e kontrolluara nga ta, nuk e mundëson kurrsesi krijimin e institucioneve në një marrëveshje normale, bazuar në vota, me fituesin e zgjedhjeve VV-Guxo-Alternativa në krye, atëherë nuk ka rrugë tjetër pos zgjedhjeve të jashtëzakonshme.
