Shkruan: Hyzri SALIHU
Kjo është një thirrje që nuk buron nga mllefi, por nga brenga. Një thirrje që nuk synon të fajësojë, por të vetëdijësojë.
Sepse, përtej emrave dhe partive, kombi ynë ka nevojë për njerëz që e ndiejnë peshën e përgjegjësisë.
Sot, ajo që mungon më shumë në hapësirën politike shqiptare nuk është as pushteti, as retorika – por vizioni dhe përgjegjësia.
Ndërkohë që kombi ballafaqohet me sfida serioze, me kërcënime të brendshme dhe të jashtme, me përçarje sociale dhe izolim ndërkombëtar, shumica e klasës politike mbetet e mbyllur në betejat e brendshme për pushtet, në luftën për poste, e jo në betejën për të ardhmen e kombit.
Është e dhimbshme të shohësh se si mungesa e mendimit strategjik është zëvendësuar nga llogaritjet elektorale.
Si mungesa e bashkëpunimit është zëvendësuar nga përjashtimi dhe përçmimi.
Dhe më e rënda: si mungesa e këshilltarëve të mirëfilltë është zëvendësuar nga militantët dhe servilët. E gjithë kjo ndodh, ndërkohë që NATO dhe aleatët tanë nuk mund të jenë zëvendësim për vetëmbrojtjen tonë morale, kulturore dhe institucionale.
As nuk mund të jenë justifikim për papërgjegjësi.
As ambasadat, e as miqësitë ndërkombëtare, nuk mund të zëvendësojnë mungesën e burrave dhe grave të shtetit.
Të jesh politikan shqiptar sot është mision.
E nëse nuk jeni gati ta mbani këtë barrë, atëherë nuk jeni gati as të udhëhiqni.
Sepse ne nuk kemi luksin të dështojmë më.
Historia nuk fal më shumë eksperimente dhe populli nuk duron më shumë mashtrime.
Sot, fati i shqiptarëve në rajon nuk varet nga rastësia – por nga organizimi. Jo nga improvizimi – por nga bashkërendimi.
Jo nga fjalët – por nga veprimet.
Prandaj, ftoj publikisht të gjithë faktorët politikë e institucionalë shqiptarë që të lënë mënjanë ndasitë boshe dhe të ulen në një tryezë kombëtare të përgjegjësisë.
Jo për të ndarë pushtetin, por për të ndarë barrën e përbashkët: mbrojtjen e interesit kombëtar, ndërtimin e sigurisë, ruajtjen e identitetit dhe forcimin e bashkëpunimit rajonal shqiptar.
Është koha të zgjohemi para se të na zgjojnë të tjerët. Sepse historia nuk e pret askënd. Dhe ne s’mund të përfaqësojmë një komb të vjetër me mendësi të vogla.
