Presidenti rus, Vladimir Putin, ka hedhur poshtë një ultimatum nga udhëheqësit e vendeve më të fuqishme evropiane dhe ka propozuar bisedime të drejtpërdrejta paqeje me Ukrainën më 15 maj në Stamboll. Ai tha se Rusia po propozon bisedime të drejtpërdrejta me Ukrainën në Stamboll të enjten, më 15 maj, në një përpjekje për të “eliminuar shkaqet rrënjësore të konfliktit” dhe “për të arritur rivendosjen e paqes afatgjatë dhe të qëndrueshme”.
Kryeministri polak Donald Tusk është udhëheqësi i fundit evropian që reagon ndaj propozimit të presidentit rus Vladimir Putin për negociata të drejtpërdrejta me Ukrainën.
Në një postim në platformën X, Tusk – i cili ishte në Kiev me udhëheqës të tjerë evropianë të shtunën – shkroi: “Në përgjigje të apelit tonë, rusët kanë propozuar bisedime paqeje që fillojnë më 15 maj. Por bota po pret një vendim të qartë për një armëpushim të menjëhershëm dhe pa kushte. Ukraina është gati. Mjaft me viktima!”
Kancelari i ri gjerman Friedrich Merz tha të dielën se oferta ruse për bisedime të drejtpërdrejta me Ukrainën ishte një “shenjë e mirë”, por se ishte “larg të mjaftueshme”.
“Ne presim që Moska të bjerë dakord për një armëpushim që do të lejojë negociata të vërteta. Së pari armët duhet të heshtin, vetëm atëherë mund të fillojnë bisedimet”, tha Merz në një deklaratë të raportuar nga Agence France-Presse.
Merz, i cili u konfirmua si kancelar të martën pas një fillimi të pasigurt, është zotuar se mbështetja e fortë për Ukrainën do të jetë në zemër të politikave të qeverisë së tij, mes shqetësimeve të vazhdueshme në lidhje me angazhimin e Amerikës për sigurinë ndaj Evropës nën drejtimin e Presidentit Donald Trump.
Siç vëren korrespondenti evropian i gazetës Guardian, Jon Henley, Merz është më i hapur se paraardhësi i tij Olaf Scholz për dërgimin e raketave gjermane me rreze të gjatë veprimi në Ukrainë, si dhe për pjesëmarrjen e ushtarëve gjermanë në misionet paqeruajtëse.
Të shtunën, ai iu bashkua kryeministrit britanik Keir Starmer, presidentit francez Emmanuel Macron dhe kryeministrit polak Donald Tusk në Kiev, ku ata u takuan me Volodymyr Zelensky në një shfaqje mbështetjeje për Ukrainën.
Rusia sapo i është përgjigjur komenteve të Presidentit ukrainas Volodymyr Zelensky në lidhje me një armëpushim dhe bisedime paqeje. Zëdhënësja e Ministrisë së Jashtme ruse, Maria Zakharova, tha se Ukraina e kishte keqkuptuar Vladimir Putinin.
Sipas saj, Putin beson se “shkaqet rrënjësore” të konfliktit duhet të negociohen së pari dhe vetëm atëherë mund të flitet për një armëpushim. Ndërkohë, ambasadori rus me kompetenca të veçanta në Ministrinë e Punëve të Jashtme, Rodion Miroshnik, tha në Telegram se propozimi për armëpushim nga Zelensky është vetëm një përpjekje për të riarmatosur dhe riorganizuar ushtrinë ukrainase.
Sipas agjencisë shtetërore ruse të lajmeve Tass, Ministria ruse e Mbrojtjes tha se Ukraina kishte shkelur armëpushimin tre-ditor, i cili përfundoi të shtunën, më shumë se 14,000 herë dhe se forcat ukrainase ishin përpjekur të shkelnin kufirin jugor të Rusisë pesë herë.
Të enjten, ditën e parë të armëpushimit, Ukraina akuzoi Rusinë për më shumë se 730 shkelje dhe tha se forcat e saj do të reagonin në mënyrë adekuate.
