Kreu i Komisionit Qendror të Zgjedhjeve, Ilirjan Celibashi, deklaroi se procesi zgjedhor është zhvilluar përgjithësisht mirë, përveç disa problemeve të izoluara që, sipas tij, janë adresuar menjëherë.
“Tashmë kemi hyrë në një fazë shumë të rëndësishme, atë të numërimit të votave. Votat ndodhen në kutitë e votimit dhe presim të numërohen. E rëndësishme është të ketë qetësi,” u shpreh Celibashi.
Ai shtoi se procesi është monitoruar nga përfaqësues të partive politike, media, si dhe organizata vendore dhe ndërkombëtare. Celibashi garantoi se KQZ nuk do të tolerojë asnjë rast që mund të cënojë integritetin e numërimit dhe të rezultateve.
“Të gjitha problemet e evidentuara në terren i kemi referuar pranë prokurorive përkatëse dhe SPAK-ut. Tani presim veprimet e institucioneve përkatëse të ndjekjes penale,” tha ai.
Sa i përket pjesëmarrjes në votime, Celibashi bëri të ditur për Radio Kosovën se përqindja mund të shkojë rreth 42%, duke shtuar se kjo përfaqëson një rënie krahasuar me zgjedhjet e kaluara.
Rezultatet e para paraprake pritet të shpallen në orën 00:00.
