Janë bërë 27 vjet nga rënia heroike e një prej figurave kyçe të UÇK-së, Agron Rrahmanit, i cili ishte vrarë pesë ditë pas vrasjes së heroit Bahri Fazliu. Që të dy, për disa muaj, kishin qenë të burgosur në kohën e demonstratave të atëhershme, ndërsa më pas i ishin bashkuar Ushtrisë Çlirimtare të Kosovës.
Në 27-vjetorin e rënies së Agron Rrahmanit, një prej figurave kyçe të Ushtrisë Çlirimtare të Kosovës, autoritetet dhe qytetarët kanë kujtuar kontributin e tij për lirinë e vendit. Kryeministri në detyrë, Albin Kurti, gjatë homazheve, theksoi se humbja e Rrahmanit, ashtu si ajo e Bahri Fazliut, ishte një goditje e rëndë për luftën çlirimtare.
“Pesë ditë pas vrasjes së Bahri Fazliut është vrarë edhe Agron Rrahmani. Këto dy vrasje të heronjve tanë të popullit, të luftëtarëve të paepur, të njerëzve aq të dashur, kanë qenë goditje shumë të mëdha për luftën e Ushtrisë Çlirimtare të Kosovës. Agron Rrahmani ka pasur edhe të njëjtën moshë me Bahri Fazliun. Gjatë viteve ’89-’90 kanë qenë të dy në burg në kohën e demonstratave dhe më pas janë organizuar bashkërisht me pjesëtarë të UÇK-së dhe, me dallim prej 5 ditësh, bien heroikisht në përballje me forcat armike. Agron Rrahmani, sikurse edhe të gjithë dëshmorët e kombit, e përbëjnë historinë e kombit, ndërkaq pikërisht kujtimi ynë për ta, besnikëria jonë ndaj tyre, na ndriçon rrugën tonë përpara, në mënyrë që të ecim edhe në mbrojtje të atdheut, edhe me demokracinë e institucioneve, edhe me progres për shoqërinë dhe zhvillim për ekonominë tonë, për këtë brez dhe për brezat që do të vijnë”, tha Kurti.
Bashkëluftëtarë e familjarë, gjersa bënë homazhe te varri i Agron Rrahmanit, nderuan sakrificën e tij për liri.
“Agroni ka ra si rezultat i punës së tij të përditshme, si rezultat i punës dhe aktivitetit të tij për të ndërtuar institucionet tona politike, ushtarake, që luftojnë kundër pushtuesit serb dhe më 11 maj është dita kur është bërë Bashkimi i potencialit ushtarak të Lëvizjes Kombëtare për Çlirimin e Kosovës dhe Ushtrisë Çlirimtare të Kosovës”, tha Fatmir Humolli, bashkëluftëtar.
“Agron Rrahmani ka qenë njëri ndër ata të cilët i ka themeluar dhe ka qenë Komandanti i parë i njësive guerile që është quajtur atëherë, e më vonë njësive për qytet, jo vetëm të Prishtinës, por në nivel të Kosovës”, tha Sali Salihu, shok dhe bashkëveprimtar.
“Për neve si familjarë është dhimbje, por njëkohësisht edhe krenari. Agroni, Bahriu dhe mijëra dëshmorë të tjerë zgjodhën rrugën e vështirë, rrugën e përballjes me guxim me armikun dhe ranë heroikisht në fushën e nderit. Për neve mbetet detyra që ta ruajmë atë që ata e kanë arritur dhe ta përcjellim me breza, sikur mesazh që atdheun duhet dashur dhe punuar për çdo ditë më shumë për të”, tha Tafil Rrahmani, vëllai i heroit.
Agron Rrahmani ra dëshmor më 12 maj 1998, gjatë një përballjeje me forcat serbe në Lagjen e Muhaxherëve në Prishtinë.
