Presidenti i SHBA-së, Donald Trump, foli të hënën për mundësinë e pjesëmarrjes personalisht në bisedimet e paqes midis Ukrainës dhe Rusisë të enjten.
Duke iu referuar bisedimeve të ardhshme në Turqi gjatë konferencës për shtyp në Shtëpinë e Bardhë të hënën , Trump tha se “po mendonte të fluturonte atje” për në Turqi, por tha se “nuk e di se ku do të jetë të enjten”.
“Unë këmbëngula që takimi të zhvillohej. Mendoj se do të keni një rezultat të mirë në takimin e së enjtes në Turqi midis Rusisë dhe Ukrainës”, tha Trump. Më parë ai i kërkoi Ukrainës që të pranonte “ menjëherë ” bisedimet. “Unë besoj se të dy udhëheqësit do të jenë atje. Po mendoja të fluturoja atje. Nuk e di se ku do të jem të enjten. Kam kaq shumë takime. Po mendoja të fluturoja atje”, shtoi ai.
Presidenti ukrainas Volodymyr Zelensky tha të dielën se do të merrte pjesë personalisht. Udhëheqësi rus Vladimir Putin ende nuk është përgjigjur nëse ai do të shfaqet.
Pas komenteve të Trump, Zelensky shkroi në X se “të gjithë ne në Ukrainë do ta vlerësonim nëse Presidenti Trump mund të ishte atje me ne”.
“E mbështeta Presidentin Trump me idenë e bisedimeve të drejtpërdrejta me Putinin. E kam shprehur hapur gatishmërinë time për t’u takuar. Do të jem në Turqi. Shpresoj që rusët të mos e shmangin takimin”, tha Zelensky.
“Dhe sigurisht, të gjithë ne në Ukrainë do ta vlerësonim nëse Presidenti Trump do të ishte atje me ne në këtë takim në Turqi. Kjo është ideja e duhur. Ne mund të ndryshojmë shumë”, shtoi ai.
Trump ka planifikuar të vizitojë Lindjen e Mesme këtë javë në udhëtimin e tij të parë të madh ndërkombëtar të mandatit të tij të dytë si president, me ndalesa të planifikuara në Arabinë Saudite dhe Emiratet e Bashkuara Arabe (EBA).
Kjo vjen pas një cikli në zhvillim e sipër të sinjaleve nga Kremlini, Kievi, Uashingtoni dhe Brukseli kohët e fundit në lidhje me rendin e kushteve për bisedimet e paqes.
Propozime dhe kundërpropozime
Një ditë pasi Putini u takua me mysafirë të huaj në Moskë për festimet e Ditës së Fitores më 9 maj, udhëheqësit evropianë, përfshirë krerët e Mbretërisë së Bashkuar, Gjermanisë, Francës dhe Polonisë, u takuan me Zelenskyn në Kiev dhe përsëritën kërkesat e tyre për një armëpushim.
Udhëheqësit i kërkuan Kremlinit të binte dakord për një armëpushim 30-ditor pa kushte deri të hënën , duke e kërcënuar Moskën me më shumë sanksione.
Të dielën, Putin propozoi në vend të kësaj mbajtjen e bisedimeve të drejtpërdrejta me Ukrainën në Stamboll të enjten, më 15 maj, pa u ndalur te propozimi për armëpushim.
Kjo vjen pasi forcat ruse shkelën armëpushimin e pretenduar 72-orësh që Putini kishte propozuar të përkonte me ceremoninë e Ditës së Fitores Ruse në Moskë më 9 maj, ku morën pjesë udhëheqësit e mbi 20 vendeve.
Të hënën, Kremlini iu përgjigj presionit në rritje për armëpushim 30-ditor duke thënë: “Kjo gjuhë ultimatumesh është e papranueshme për Rusinë. Nuk funksionon. Nuk mund të flasësh me Rusinë në atë mënyrë.”
