Sot, me fillim nga ora 12:00, në sallën e Akademisë së Shkencave dhe Arteve të Kosovës në Prishtinë, në kujtim të figurës së akademikut e profesor Aganit, me rastin e 26-vjetorit të vrasjes së tij, në bashkëpunim me Muzeun Kombëtar të Kosovës dhe Akademinë e Shkencave dhe Arteve të Kosovës, do të hapet ekspozita përkujtimore “Kontributi atdhetar, intelektual dhe politik i akademik Fehmi Aganit”.
Besnik Rraci, autor i ekspozitës, theksoi se “Fehmi Agani ka qenë profesor, akademik, figurë shumëdimensionale dhe këto institucione kanë hedhur idenë për të hapur një ekspozitë tematike historike kushtuar figurës së tij”.
Ai në “Mirëmëngjesi Kosovë” në RTK , duke treguar për materialet e ekspozuara, tha se paraqitet një historik i shkurtër i biografisë shumë të pasur të profesorit, dimensioni arsimor, edukativ, intelektual, akademik, por aspekti politik.
“Në historinë më të re të Kosovës ka luajtur rol qendror dhe të pakontestueshëm për lirinë dhe pavarësinë e Kosovës”, shtoi ai.
Ndër të tjera, ai bëri me dije se përgatitja e ekspozitës i ka marrë kohë rreth gjashtë muaj.
Ekspozita do të qëndrojë e hapur deri të hënën.
