Është anuluar konferenca e kryetares së Gjykatës Speciale, Ekaterina Trendafilova. Lajmin e ka konfirmuar Angela Griep, zëdhënëse e Dhomave të Specializuara të Kosovës.
“Mund të konfirmoj që ngjarja e sotme është anuluar për arsye të sigurisë publike dhe bazuar në këshillën e Policisë së Kosovës. Kjo është gjithçka që mund t’ju them për momentin. Do të shohim më vonë për ndonjë informacion shtesë”, ka thënë ajo.
Anulimi erdhi pas protestës së veteranëve të Ushtrisë Çlirimtare të Kosovës, para hotelit ku pritej të mbahej konferenca.
Tensione në protestën e veteranëve të UÇK-së, ndërhyn policia
Veteranët e UÇK-së, pjesëmarrës në protestë kanë hedhur gazlotsjellës dhe tym të zi pranë hotelit ku po mban konferencë kryetarja e Dhomave të Specializuara, Ekaterina Trendafilova. Veteranët u dëgjuan teksa thërrisnin “UÇK, UÇK”.
Kryetari i Organizatës së veteranëve të luftës së Ushtrisë Çlirimtare të Kosovës, Hysni Gucati i ka bërë thirrje mediave që të mos marrin pjesë në konferencën e Trendafiloves. Ai ka thënë se tymi i zi është hedhur për shkak se është ditë zie për ata.
“Kjo sa herë vjen në Kosovë, vjen për një të keqe. Sot vjen Trendafilova vjen në Kosovë mban konferencë, ku ne ende kemi të pagjetur”, ka theksuar Gucati.
Gucati tha se sipas informacioneve takimi është anuluar dhe Trendafilova nuk do ta mbajë konferencën për media.
