Shkruan: Florim ZEQA
Pavarësisht faktit, se kur dhe si do të zgjidhet ngërçi politik në Kuvendin e Kosovës, kryesuesi i 16 seancave të deritanishme, z. Avni Dehari mbetet personazhi kryesor i këtij dështimi të madh! Jo pse ai është shkaktari, por pse është protagonisti kryesor i hapjes dhe mbylljes së të gjitha seancave të deritanishme!
Rregulla e konstituivit të Kuvendit
Zgjedhjet e 9 shkurtit ishin zgjedhjet e para të rregullta parlamentare të mbajtura në Kosovë që nga shpallja e pavarësisë. Mirëpo, liderët partiak i baltosën zgjedhjet e lira dhe demokratike.
Siç dihet, sipas ligjit seanca konstituive kryesohet nga deputeti më i vjetër në moshë, i ndihmuar nga deputeti më i ri në moshë.
Ligjet nuk parashohin që gjatë seancës nuk mund të ketë debat.
Partia e parë, në këtë rast Lëvizja Vetëvendosje, propozon kandidatin për kryetar të Kuvendit, kurse nënkryetarët propozohen nga një nga partitë më të mëdha dhe nga komunitetet joshumicë dhe komuniteti serb.
Seanca konstituive, sipas Rregullores së Kuvendit, përfundon me zgjedhjen e kryetarit dhe nënkryetarëve.
Injorimi i trashëgimtares së familjes Jashari
Pra, sipas rregullores së punës së Kuvendit dhe të aktit më lartë ligjor në vend, kryesues të seancës së parë konstituive janë deputeti më i vjetër dhe më i riu në moshë, por deri më tani është injoruar deputetja më e re!
Të gjithë jemi dëshmitarë për vështirësitë e drejtimit të seancës së parë nga deputeti më i vjetër, Avni Dehari nga LVV, dhe po ashtu të gjithë jemi dëshmitarë se edhe përkundër drejtimit të 16 seancave, Avni Dehari nuk e ka arritur përvojën në drejtimin e seancave!
Ka mbetur që ta drejtojë deputeti më i vjetër, në shenjë respekti dhe për faktin se askush nuk e ka imagjinuar bllokimin e punës së Kuvendit në fazën fillestare. Prandaj edhe e kemi këtë paradoks të drejtimit 16 radhazi të seancës konstituive nga i njëjti person!
Por, do të ishte e udhës, që së paku një nga 16 seancat e deritanishme t’i jepej rasti edhe deputetes më të re, Sala Jashari që të drejtojë Kuvendin, në shenjë respekti për familjen e saj emblematike!
Sala Jashari është një prej më të votuarve në listën e 110 kandidatëve për deputetë nga radhët e Partisë Demokratike të Kosovës!
Numri i votave të Sales nuk paraqet kurrfarë relevance sa i përket drejtimit të seancës.
Janë tri çështje më të rëndësishme që duhej të preknin ndërgjegjen e Avni Deharit dhe të drejtuesve të LVV-së; mosha, aspekti gjinor dhe trashëgimia familjare, për t’ia lënë pak hapësirë edhe deputetes më të re që të bëjë pak përvojë në drejtimin e seancave të Kuvendit!
Kjo, përveçse mungesë respekti ndaj familjes Jashari, paraqet edhe mungesë besimi ndaj kandidates së rivalit politik, e cila nuk mund të bënte diçka më shumë apo më pak se Avni Dehari në drejtimin e seancave të Kuvendit.
Sala Jashari nga Prekazi është trashëgimtare e familjes Jashari. Ajo trashëgon emrin e gjyshes së saj, Salë Jasharit, Sala e cila kishte mbetur e vdekur bashkë me 58 anëtarët tjerë të Familjes së Adem Jasharit!
Drejtim i 16 seancave nga i Avni Dehari, pa i dhënë rastin së paku një herë shoqërueses së tij, e dëshmon mentalitetin primitiv të shqiptarëve, kur një herë hypin në ‘fron’ e kanë të vështirë të heqin dorë derisa t’u skadoj afati ligjor!
Si do që të jetë, deputeti Avni Dehari, apo babai i dështimeve të Kuvendit, tashmë ka hyrë në historinë e jetës parlamentare në Kosovë, si drejtuesi provizor që ka qëndruar më së gjati në karrigen e kryesuesit të Kuvendit! Mbase mund ta ketë rast edhe për të hyrë në Librin e Rekordeve Botërore-Gines! Nuk i dihet, pasi ‘telenovela’ e seancave të Kuvendit po vazhdon në pambarim!
