Donjeta Sahatçiu, ish-nënkryetare e Komunës së Prishtinës, ka bërë të ditur se projekti për hapjen e shkollës 42, që kishte mbetur pezull në Prishtinë, është realizuar tani me sukses në Tiranë. Ajo ka marrë përsipër realizimin e projektit të shkollës 42 Tirana, e cila është shkolla e parë e kodimit me mësim jotradicional në rajon.
Sahatçiu theksoi se shkolla 42 ishte një projekt i ndërtuar me pasion dhe besim të thellë për mundësitë që ofron edukimi dhe teknologjia. “Një prej kapitujve më domethënës të udhëtimit dyvjeçar në qeverisje ka qenë angazhimi me gjithë zemër për mundësimin e hapjes së shkollës 42 në Prishtinë – një projekt që, ndonëse mbeti pezull padrejtësisht pas dy viteve punë, gjithmonë ka qenë një vizion që e kam dashur me e pa të realizuar”, shkroi ajo nw Facebook.
Megjithatë, pas një viti, Donjeta ka marrë përsipër një detyrë të re, duke e realizuar këtë projekt në Tiranë. “Një vit më vonë, një kthesë e papritur e fatit më çoi në Tiranë. Me emocione të përzime dhe një ndjenjë të madhe përgjegjësie, e mora përsipër të ndërtoj dhe të udhëheq shkollën 42 Tirana,” tha Sahatçiu.
Në përurimin e kampusit të ri të shkollës 42 Tirana, Sahatçiu mirëpriti presidentin francez Emmanuel Macron, kryeministrin e Shqipërisë Edi Rama dhe themeluesin e 42, Xavier Niel. Ajo njoftoi se kjo shkollë tani është pjesë e familjes globale të shkollave 42, që përfshin 55 kampuse në botë, dhe është realizuar falë mbështetjes nga Fondacioni Shqiptaro-Amerikan për Zhvillim (AADF), Bashkia e Tiranës dhe Qendra Piramida.
“Ky projekt është bërë realitet falë përkrahjes së institucioneve që besuan në potencialin e tij. Në vetëm tre muaj, shkolla ka tërhequr mbi 2,000 regjistrime për 150 studentët e parë që do të nisin mësimet në tetor. Ky fillim tregon se ka një nevojë të madhe për transformimin e edukimit dhe mundësitë që ky projekt ofron për të rinjtë,” shtoi ajo.
Në fund, Donjeta Sahatçiu shprehu kënaqësinë dhe krenarinë për këtë realizim. “Në Prishtinë, çdo takim me ekipin e 42 e përfundoja atëherë me ‘Let’s do this!’ – tash e them me zemrën plot: ‘We did it!’ në Tiranë, dhe me një dëshirë që nuk shuhet – me e pa këtë vizion të gjallë edhe në Prishtinë.”
