Punëtorët e “Pastrimit” kanë protestuar para Komunës së Prishtinës. Ata ndër të tjera kanë kërkuar pagesën e borxhit 2.7 milionë eurosh që kompania pretendeon se ia ka Komuna e Prishtinës.
“Paguaje borxhin o borxhli i keq”, “Mos bëj politikë me dështimin tënd”, “Na lë të punojmë” kanë qenë disa nga pankartat që punëtorët kanë mbajtur në duar.
Pas protestës, kryetari i Prishtinës, Përparim Rama, priti në takim përfaqësuesit e Sindikatës së Ndërmarrjes “Pastrimi” pas situatës së rëndë të krijuar në kryeqytet, për shkak mosheqjes së mbeturinave disa ditë, gjë që ngjalli pakënaqësi të mëdha ndër qytetarë.
Rama ka theksuar se punëtorët nuk janë fajtorë për situatën e krijuar dhe theksoi se problemi qëndron te menaxhmenti i ndërmarrjes, që sipas tij, nuk ka ditur të menaxhojë proceset.
“Faji nuk është tek ju, as ne nuk i fajësojmë punëtorët. Faji është te menaxhmenti dhe nuk duhet me udhëheq njerëzit, të cilët nuk e dinë procesin. Ne qysh në vitin e kaluar e kemi marrë iniciativën me sjellë edhe kompani private për të ndihmuar pastrimin, sepse kemi parë që ka nevojë prej që kemi sjellë ata qyteti është pastruar, por në asnjë kohë nuk e kemi cenuar kompaninë ‘Pastrimi’”, ka thënë ai.
Përfaqësuesit e Sindikatës së Ndërrmarjes “Pastrimi” në këtë takim kanë këruar që të mos dëmtohen punëtorët.
Në GFacebook Rama ka shkruar se nuk do të lejohet që keqmenaxhimi të rrezikojë shëndetin publik dhe pagat e punëtorëve të ndërrmarjes “Pastrimi”.
“Sot prita në takim përfaqësuesit e Sindikatës së Punëtorëve të kompanisë “Pastrimi”. I falënderoj sindikalistët dhe të gjithë punëtorët për qëndrimin e tyre të përgjegjshëm dhe për bashkëpunimin e tyre të sinqertë në këto momente të kritike për ta dhe qytetarët. Ne jemi në anën tuaj. Të drejtat tuaja nuk janë të negociueshme, dhe askush nuk do të mbetet pa punë për shkak të dështimeve menaxheriale. Jemi të vendosur të veprojmë me integritet dhe vendosmëri për të mbrojtur interesin publik dhe dinjitetin e punëtorëve”, ka shkruar ai.
