KREMLINI i përshkroi zgjedhjet presidenciale të Rumanisë si “të çuditshme” vonë dje, duke thënë se kandidati pro-rus, i cili fitoi zgjedhjet e anuluara vitin e kaluar, u skualifikua ‘padrejtësisht’.
Qendristi pro-evropian, Nicusor Dan, mundi një rival të krahut të djathtë dhe nacionalist në zgjedhjet e përsëritura të dielën, pasi favoriti i zgjedhjeve të vitit 2024, Calin Georgescu, u skualifikua pasi autoritetet rumune pretenduan se Rusia ndërhyri në zgjedhje në favor të tij.
“Këto zgjedhje ishin të çuditshme, për të mos thënë më shumë”, tha zëdhënësi i Kremlinit, Dmitry Peskov.
“Ne e dimë historinë e kandidatit që kishte shansin më të mirë për të fituar. Pa u gjetur asnjë justifikim, ai thjesht u hoq me forcë nga gara.”
Rusia mohon ndërhyrjen, Brukseli i lehtësuar nga fitorja e Danos
Rusia më parë ka mohuar çdo rol në fushatën e Georgescu-t dhe ka akuzuar autoritetet rumune për pengimin e kandidaturës së tij për arsye politike.Fitorja e Danit solli lehtësim për vendimmarrësit e qendrës në Bruksel, ku ka shqetësime se pakënaqësia publike për migracionin dhe koston e lartë të jetesës mund të çojë në mbështetje më të madhe për partitë e ekstremit të djathtë dhe të dëmtojë unitetin e kontinentit kur bëhet fjalë për marrëdhëniet me Rusinë.
