Kryesuesi i seancës konstituive të Kuvendit të Kosovës, Avni Dehari, deklaroi se as sot nuk pret që të ketë zhvillime të reja në Kuvend, teksa theksoi se kjo varet nga krerët e partive politike.
“Do të dëshiroja të kishte diçka të re, sepse është bërë shumë gjatë. Mirëpo kjo nuk varet nga unë, varet prej krerëve të partive politike. Unë jam vetëm drejtues teknik. Shpeshherë ka edhe keqkuptime – njerëzit më thonë: ‘Pse nuk po i jep zgjidhje kësaj pune?’ – por unë nuk jam aty as për t’i dhënë zgjidhje, as për të mos i dhënë zgjidhje, as për ta imponuar mënyrën e votimit – si të votojnë apo si të mos votojnë. Më ka rënë hise për shkak të moshës, jo për shkak të ndonjë privilegji tjetër,” tha Dehari.
Në pyetjen e gazetarëve se sipas deklaratave të partive opozitare ai po përdoret nga LVV, ai tha: “I kam dëgjuar se Avni Dehari e ka një skenar të Sekretarisë, dhe një të Albin Kurtit. Nuk dua të merrem me ta. Skenari na vjen prej Sekretarisë, më vjen mua dhe Sala Jasharit, atë skenar e kam. Skenari do të ndryshojë kur krerët e partive të merren vesh. Do të isha i lumtur që ai skenar t’i jap fund këtij ngërçi. 6 herë u votua me votim të hapur, nuk ka dhënë rezultat. Janë në pyetje inatet. Tri seanca kanë shkuar kot”, tha ai më tutje.
