Gjykata Themelore në Ferizaj ka njoftuar se ka dënuar E.M. me shtatë vjet burgim, i cili në qershor të vitit 2021 në rrugën Ferizaj-Shtime pati shkaktuar një aksident në të cilin patën humbur jetën pesë persona.
Në njoftim thuhet se i pandehuri u dënua për veprën penale “rrezikim i trafikut publik”. Në dënim do t’i llogaritet edhe periudha e kaluar në paraburgim. Atij po ashtu i është marrë leja e vozitjes dhe i ndalohet marrja e lejes së re për katër vjet.
Në aksident lëndime patën marrë edhe pasagjerët në veturën e E.M.
“Trupi gjykues i kryesuar nga gjyqtari Ilir Bytyqi – kryetar i trupit gjykues, pas mbajtjes së shqyrtimit gjyqësor dhe administrimit e të gjitha provave personale dhe materiale, të pandehurin E.M., e shpalli fajtor dhe të njëjtin e gjykoi për veprën penale rrezikimi i trafikut publik nga neni 370 paragrafi 9 lidhur me paragrafin 6 dhe paragrafin 1 të Kodit Penal të Republikës së Kosovës (KPRK), për të cilën i shqiptoi dënim burgimi në kohëzgjatje prej shtatë (7) vjet, në të cilin dënim do ti llogaritet koha e kaluar në paraburgim, i cili dënim do të ekzekutohen pas plotfuqishmërisë së këtij aktgjykimi. Gjithashtu, gjykata sipas detyrës zyrtare konform nenit 59 paragrafi 1 dhe 2 nën paragrafi 2.6 lidhur me nenin 65 paragrafi 1 të KPRK-së, i shqiptoi dënim plotësues marrja e lejes së vozitjes dhe i ndalohet marrja e lejes së re të vozitjes për kategorinë B1, B, M, L, dhe T, për periudhë kohore prej katër (4) vite, në të cilën koha e mbajtur në burg nuk llogaritet në kohëzgjatjen e këtij dënimi”, thuhet në njoftim.
Po ashtu në njoftim të theksohet se E.M. më 6 qershor 2021 në rrugën Ferizaj – Shtime, ka dalë nga shiriti i tij duke goditur me veturën e tij veturën që vinte nga kahja e kundërt. Në vendin e ngjarjes patën vdekur viktimat N.R., Xh.R., S.R., dhe një i mitur. Ndërkaq viktima I.R. pati vdekur në QKUK.
“I pandehuri E.M., akuzohet se më datë 6 qershor 2021, rreth orës 15:33, në rrugën magjistrale Ferizaj – Shtime, saktësisht në fshatin Koshare – Komuna Ferizaj, duke drejtuar automjetin e markës “Audi A8”, ngjyrë e zezë, me të arritur përballë firmës “L.S.”, nga pakujdesia e vetëdijshme shkel nenin 53 paragrafi 1 të Ligjit për Rregullat e Trafikut Rrugor, duke mos e përshtatur shpejtësinë e lëvizjes së automjetit kushteve të rrugës në vendbanim si dhe duke mos i respektuar rregullat dhe shenjat e komunikacionit, nuk ka mbajtur trajektoren e duhur të lëvizjes në shiritin e tij qarkullues dhe ka kaluar me automjet në shiritin qarkullues të kahjës së kundërt dhe me pjesën e përparme të automjetit e godet automjetin e tipit “Golf II”, në pjesën e përparme të anës së majtë e cila veturë ishte duke lëvizur nga drejtimi Shtime – Ferizaj, ku nga pasojat e këtij aksidenti në vendin e ngjarjes ndërrojnë jetë në vendin e ngjarjes viktimat N.R., Xh.R., S.R., dhe një i mitur, ndërsa viktima I.R., ndërron jetë në QKUK në Prishtinë, derisa L.H., pasagjeri në “Audi A8” person lëndime të rënda trupore, ndërsa pasagjeri tjetër në “Audi A8” Y.H, person lëndime të lehta trupore si në ekspertizën mjeko ligjore”, thuhet tutje në njoftim.
Kundër këtij aktgjykimi, palët kanë të drejtë ankese në afat prej tridhjetë (30) ditëve nga dita e pranimit të aktgjykimit në formë të shkruar.
Ankesa i drejtohet Gjykatës së Apelit në Prishtinë, përmes Gjykatës Themelore në Ferizajt.
