Ish-kryeministri izraelit Ehud Olmert pretendon se Izraeli po kryen krime lufte në Gaza dhe se “mijëra palestinezë të pafajshëm janë vrarë, si dhe shumë ushtarë izraelitë”.
Olmert, i cili ishte kryeministër izraelit nga viti 2006 deri në vitin 2009, shkroi në një artikull për gazetën izraelite Haaretz se “qeveria izraelite aktualisht po zhvillon një luftë pa qëllim, pa synime apo planifikim të qartë dhe pa asnjë perspektivë suksesi”.
“Që nga themelimi i tij, shteti i Izraelit nuk ka zhvilluar kurrë një luftë të tillë… Banda kriminale e udhëhequr nga Benjamin Netanyahu ka vendosur një precedent të pashembullt në historinë izraelite dhe në këtë fushë”, shtoi ai. Një ish-anëtar i Likud, e njëjta parti si Netanyahu, shkroi se “vuajtjet e pakuptimta midis popullsisë palestineze” kanë arritur “përmasa monstruoze” në javët e fundit.
“Ajo që po bëjmë tani në Gaza është një luftë shkatërrimi”
“Operacionet e fundit në Gaza nuk kanë të bëjnë fare me qëllime legjitime lufte. Kjo tani është një luftë politike private. Rezultati i saj i menjëhershëm është shndërrimi i Gazës në një zonë katastrofe humanitare”, deklaroi ai.
Ai pranoi se shpesh kishte pohuar se Izraeli nuk po kryente krime lufte në Gaza dhe tha me bindje se “në asnjë rast një zyrtar qeveritar nuk ka dhënë urdhra për të sulmuar pa dallim civilët në Gaza”.
Megjithatë, ai vuri në dukje se në javët e fundit ai “nuk ka qenë më në gjendje ta bëjë këtë”. “Ajo që po bëjmë tani në Gaza është një luftë shkatërrimi: vrasja pa dallim, e pakufizuar, mizore dhe kriminale e civilëve. Ky është rezultat i politikës qeveritare… Po, Izraeli po kryen krime lufte”, përfundoi ai.
Intervista e tij me BBC-në shkaktoi reagime të stuhishme.
Në një intervistë me BBC javën e kaluar, Olmert përshkroi se vazhdimi i konfliktit nuk mund të kontribuonte në shpëtimin e jetës së pengjeve. Komentet e tij për një stacion televiziv britanik shkaktuan një debat në Izrael.
Ministri i Jashtëm izraelit e akuzoi Olmertin për “pjesëmarrje aktive në një fushatë diplomatike, një luftë propagandistike dhe një luftë ligjore kundër Shtetit të Izraelit dhe IDF-së”. Ministri i Arsimit, Yoav Kisch, tha se Olmert i ishte bashkuar një “kori radikal të krahut të majtë që shpif Izraelin në skenën ndërkombëtare”.
Ministrja e Barazisë Sociale, May Golan, akuzoi Olmertin se “pështyu në fytyrë” ushtarët izraelitë.
