Shtëpia e Bardhë e ka falënderuar Elon Musk për shërbimin e tij, pasi miliarderi njoftoi se po i jepte fund përfshirjes së tij në administratën e Presidentit Donald Trump, tha zëdhënësja e presidentit.
“E falënderojmë për punën e tij. E falënderojmë që nisi DOGE-n (një akronim për Departamentin e tij të Efikasitetit të Qeverisë) dhe përpjekjet për të zvogëluar shpërdorimin, mashtrimin dhe abuzimin do të vazhdojnë”, u tha gazetarëve zëdhënësja e Shtëpisë së Bardhë, Karoline Leavitt.
Ajo nuk pranoi të komentojë më tej mbi largimin e miliarderit i cili kritikoi aleatin e tij të ngushtë, Trump, për herë të parë këtë javë.
Musk konfirmoi dje se po i jep fund misionit të tij për të ulur kostot federale, pas katër muajsh pjesëmarrjeje në një eksperiment të paprecedentë.
“Misioni i Doge do të bëhet edhe më i fortë”
“Ndërsa mandati im si punonjës i posaçëm qeveritar po mbaron, dua të falënderoj Presidentin Donald Trump që më dha mundësinë të zvogëloj shpenzimet e panevojshme”, shkroi sipërmarrësi në platformën e tij sociale X të mërkurën.
“Misioni Doge do të bëhet edhe më i fortë në të ardhmen dhe do të bëhet një mënyrë jetese në qeveri”, tha kreu i kompanive Tesla, SpaceX dhe X.
Shtëpia e Bardhë njoftoi të enjten se anëtarët e administratës Trump do të punojnë me punonjësit e DOGE-së në agjenci të ndryshme federale për të çuar përpara përpjekjet ekzistuese.
Ministrat “kanë punuar ngushtë me Elon Musk dhe do të vazhdojnë të punojnë me stafin e DOGE-së që i është bashkuar të gjitha këtyre agjencive” pasi u emëruan nga presidenti, u tha Leavitt gazetarëve.
