Rruga nga fshati Nerodime drejt Jezercit, veçanërisht në lagjen Reka, po cilësohet si zonë e rrezikshme për shkak të shpejtësisë së lartë të automjeteve. Shtatë aksidente janë regjistruar këtë vit, ndërsa banorët kërkojnë vendosjen e pengesave për të parandaluar tragjeditë. Komuna thotë se procedurat për vendosjen e policëve të shtrirë janë në fazën përfundimtare.
Rruga nga fshati Neredime në drejtim të fshati Jezerc të komunës së Ferizajt, gjegjësisht në lagjen Reka, po konsiderohet e rrezikshme për shkak të zhvillimit të shpejtësisë së madhe të automjeteve në këtë pjesë.
“Kjo rrugë paraqet shumë rrezik kjo rrugë frekuentohet shumë edhe zhvillohet një shpejtësi shumë e madhe prej veturave dhe janë bërë disa aksidente në vit. Kërkojnë nga organet kompetente që ta marrin masa me ndonjë pengesë së paku që të mos ndodhë ndonjë fatkeqësi më e madhe se banorët janë shumë të rrezikuar shumë këtu çdo ditë”, thotë Fadil Hajdari, banor i fshatit Nerodime e Epërme.
Në komunë thanë se shumë shpejt pritet që të vendosen pengesa në këtë rrugë
“Sa i për ketë drejtorisë tonë i kemi marrë të gjitha para masat dhe të gjitha preventivat që të kryhen sa më shpejtë procedurat e cila është në fazën e prokurimit kjo lloj kontrate. Shpresojmë që është çështje ditësh kur ajo rrugë do të pajiset me policë të shtrirë dhe të gjitha rrugët e tjera ku është e nevojshme që e kemi paraparë në bazë të ekspertëve tonë të komunikacionit kanë paraparë të ketë policë të shtrirë”, thotë Alberton Sahiti, drejtor i Shërbimeve Publike dhe Emergjencë.
Sipas policisë, gjatë këtij viti, në këtë rrugë kanë ndodhur 7 aksidente trafiku, 3 prej të cilave në lagjen Reka, dy me dëme materiale dhe 1 me lëndim.
Apelohet te të gjithë pjesëmarrësit në komunikacion që në këtë pjesë të rrugës të shtohet kujdesi gjatë ngasjes.
