Kryetari i komunës së Gjilanit, Alban Hyseni, bashkë me nënkryetarin Kadir Hysenin, kanë pritur në takim ambasadorin e Republikës së Turqisë në Kosovë, Sabri Tunç Angılı dhe ministrin në detyrë të Zhvillimit Rajonal, Fikrim Damka, bashkë me zëvendësministrin Elldin Uglarin dhe drejtorin e DPKZhR-së, Ylber Çitakun.
Në njoftimin e komunës bëhet me dije se temë e bisedës ishin realizimi i projekteve të përbashkëta në të mirën e banorëve të Komunës së Gjilanit.
Hyseni tha se kishte kënaqësinë të pres në takim ministrin në detyrë të Zhvillimit Rajonal, Fikrim Damka dhe ambasadorin e Republikës së Turqisë në Kosovë, Sabri Tunç Angılı.
“Diskutuam për projektet e përbashkëta që do të ndikojnë drejtpërdrejt në zhvillimin ekonomik dhe infrastrukturor të komunës sonë. Bashkëpunimi me institucionet qendrore dhe mbështetja nga partnerët ndërkombëtarë janë çelësi për një Gjilan më të zhvilluar”, tha Hyseni, thuhet në njoftim.
I pari i Gjilanit, tregoi se në këtë takim, i shprehu ambasadorit mirënjohjen e thellë për kontributin e çmuar të komunitetit turk në komunën tonë dhe për mbështetjen e vazhdueshme që Turqia i ka dhënë Kosovës ndër vite.
Ambasadori i Turqisë shprehu përkrahjen për projektet që fuqizojnë zhvillimin rajonal dhe thellojnë marrëdhëniet ndërmjet institucioneve lokale dhe ndërkombëtare.
Ndërkaq ministri Damka, tha se qëllimi i vizitës ishte diskutimi i bashkëpunimit me Komunën e Gjilanit.
“Gjatë takimit u diskutua për ecurinë e projekteve aktuale, sfidat e implementimit dhe mundësitë për bashkëpunime të reja në të ardhmen”, tha Damka, thuhet tutje në njoftim.
