Në aksion janë arrestuar 17 persona të dyshuar, si dhe janë sekuestruar 38 mjete të kryerjes së veprës penale ku përfshihen: 9 kamionë, 14 ekskavator, 15 makineri seperimi, si dhe prova të tjera materiale, ku vlera totale e sekuestrimit është rreth 2 milionë euro.

Sipas njoftimit, të pandehurit në vazhdimësi nga shkurti deri më 4 qershor përreth lumit “Drini i Bardhë” kanë vepruar në kundërshtim me Ligjin për Minierat dhe Mineralet, duke bërë ndotjen, degradimin dhe shkatërrimin e mjedisit dhe kanë shfrytëzuar “jashtë mase burimet natyrore, duke eksploatuar, përpunuar dhe separuar rërë dhe zhavorr”.

Me këto veprime thuhet se secili veç e veç ka kryer veprën penale “Ndotja, degradimi ose shkatërrimi i mjedisit”.

Po ashtu, thuhet se të njëjtit me veprimet e ndërmarra kanë shkatërruar rrjedhën e lumit nga nxjerrja e rërës dhe zhavorrit nga punimet e makinerive të rënda, duke lënë gropa të hapura, në vende ku mund të lëvizin një numër i madh i njerëzve. Kështu që kanë shkaktuar edhe rrezik të madh për trupin dhe jetën e njerëzve të cilët mund të lëvizin në atë territor.

Me këto veprime, secili veç e veç ka kryer veprën penale “Shkaktimi i  rrezikut të përgjithshëm”.

Njoftohet se gjatë aksionit, njëri nga të pandehurit ka penguar zyrtarët policorë në kryerjen e detyrave të punës, andaj ndaj tij bie edhe vepra penale “Pengimi i personit zyrtar në kryerjen e detyrave zyrtare”.

Kurse një tjetër nga të pandehurit ka kryer veprën penale “Mbajtja në pronësi kontroll ose posedim të paautorizuar të armëve”.

Tutje bëhet e ditur se 17 të pandehurit e arrestuar, gjenden nën masën e ndalimit prej 48 orësh.