Brenda mureve të ftohta të Qendrës Korrektuese për Femra në Lipjan, ku liria është e kufizuar, shpirti krijues nuk po njeh mure. Kështu të enjten, gratë e privuara nga liria shpalosën punimet e tyre artistike dhe artizanale në një aktivitet të organizuar nga Shërbimi Korrektues i Kosovës, në bashkëpunim me organizatën Monumenta.
Kjo ngjarje synon të promovojë rehabilitimin dhe fuqizimin e grave nëpërmjet artit dhe punës krijuese.
Në aktivitet mori pjesë edhe ministrja në detyrë e Drejtësisë, Albulena Haxhiu, e cila theksoi rëndësinë e rehabilitimit përmes artit dhe edukimit, duke ofruar mbështetje për përmirësimin e kushteve brenda institucioneve korrektuese.
“Është kënaqësi të ndodhesh në një ambient përtej mureve, ku ndërtohet shpresë, zhvillim dhe dinjitet njerëzor. Kjo qendër, pavarësisht sfidave, është një shembull i vërtetë i rehabilitimit dhe zhvillimit social. Kam parë punime të realizuara me shpirt dhe mesazh të thellë — ato nuk janë thjesht punime, por dritare reflektimi, përtej gabimeve që mund të kemi bërë. Jam e përkushtuar që këto institucione të mos jenë vetëm hapësira dënimi, por vende rehabilitimi dhe rikthimi në shoqëri. Synimi im është të përmirësohet qasja ndaj edukimit dhe të krijohen kushte më të mira për të gjithë,” – tha ministrja në detyrë, Haxhiu.
Drejtori i Përgjithshëm i Shërbimit Korrektues të Kosovës, Ismail Dibrani, theksoi se këto aktivitete janë dëshmi e përkushtimit të stafit korrektues për të trajtuar të dënuarat si pjesë të barabartë të shoqërisë.
“Sfida ekzistojnë, por ajo që më bën të lumtur është fakti që kjo qendër është shndërruar në një model ku, përmes aktiviteteve, gratë kanë rifituar shpresën dhe janë përgatitur për tregun e punës, me qëllim që të ndihen të barabarta në shoqërinë e së ardhmes. Jam gjithashtu i kënaqur të theksoj se, gjatë dy viteve të fundit, nuk është regjistruar asnjë rast kontrabande në hapësirat tona,” – tha Dibrani.
Zhvillimi i këtyre aktiviteteve u tha se është një hap i rëndësishëm jo vetëm për rehabilitimin emocional dhe social të grave të dënuara, por edhe për përgatitjen e tyre drejt ri-integrimit të suksesshëm në shoqëri pas vuajtjes së dënimit.
