Një sherif federal amerikan u ndalua gabimisht nga agjentët e Imigracionit dhe Doganave (ICE) në Arizona, thanë zyrtarët amerikanë, raporton NBC News.
Një zëvendës sherif u ndalua për pak kohë në hollin e një ndërtese federale në Tucson sepse përputhej me përshkrimin e përgjithshëm të një personi të kërkuar nga policia e imigracionit, tha në një deklaratë një zëdhënës i Zyrës së Sherifit të SHBA-së. Nuk ishte e qartë saktësisht se kur ndodhi incidenti.
“Identiteti u konfirmua shpejt nga oficerë të tjerë të zbatimit të ligjit dhe ai u largua nga ndërtesa pa incidente”, tha zëdhënësja e Zyrës së Sherifit Federal, Colleen Grayman.
Zyra e Sherifit të SHBA-së nuk dha detaje shtesë dhe as nuk zbuloi identitetin e zëvendëssherifit të ndaluar.
Departamenti i Sigurisë Kombëtare i SHBA-së, i cili mbikëqyr zbatimin e ligjit për imigracionin, nuk iu përgjigj menjëherë një kërkese për koment.
Arrestime masive të emigrantëve
Më herët këtë javë, agjentët e ICE-së kryen arrestimet e tyre më të mëdha ditore për imigracionin, duke arrestuar më shumë se 2,200 persona. Vala e arrestimeve vjen në përgjigje të presionit nga Shtëpia e Bardhë për të rritur me shpejtësi dhe në mënyrë drastike arrestimet.
