Gjashtë raste të dhunës në familje janë shënuar në 24 orët e fundit, njofton Policia e Kosovës. Dy raste janë shënuar në Prishtinë, kurse nga një rast në Podujevë, Gjilan, Klinë dhe Kaçanik.
Policia ka njoftuar se në Prishtinë në një rast janë intervistuar dy të dyshuar vëllezër, të cilët pas një mosmarrëveshje kishin përdorur dhunë fizike ndaj njëri-tjetrit.
“Si pasojë e rrahjes i mituri ka marrë tretman mjekësor. Pas trajtimit të rastit me rekomandim të prokurorit kujdestar rasti procedohet në procedurë të rregullt”, thuhet në njoftim.
Në rastin e dytë në Prishtinë, është arrestuar e dyshuara femër kosovare, për shkak se kishte tentuar ta godas bashkëshortin e saj dhe ia kishte mbyllur derën e hyrjes së banesës.
“Sipas viktimës, bashkëshortja e tij ka probleme shëndetësore. Me urdhër të prokurorit pas intervistimit e dyshuara është liruar në procedurë të rregullt”, thuhet në njoftim.
Kurse në Podujevë është arrestuar i dyshuari, nën dyshimin se i njëjti kishte ushtuar dhunë fizike ndaj bashkëshortes dhe vajzës së tij 6-vjeçare.
“Si pasojë e dhunës viktimat kanë pranuar tretman mjekësor, kurse i dyshuari pas intervistimit me urdhër të prokurorit është liruar në procedurë të rregullt”, thekson policia.
Në Gjilan është arrestuar i dyshuari, nën dyshimin se i njëjti kishte ushtruar dhunë psikike dhe fizike ndaj nënës dhe motrës së tij.
“Sipas viktimave i dyshuari është recidivist i rasteve të dhunës në familje pasi është përdorues i narkotikëve dhe shumicën e kohës është i dehur. Me vendim të prokurorit, i dyshuari është dërguar në mbajtje për 48 orë”, thuhet në njoftimin e policisë raporton RTKlive.
Edhe në Klinë është arrestuar i dyshuari, pasi i njëjti në gjendje të dehur ka shkaktuar dhunë në anëtarët e familjes.
“Viktimës i është ofruar tretman mjekësor, ndërsa i dyshuari i cili dyshohet se ka ushtruar dhunë në familje edhe më herët, me vendim të prokurorit është dërguar në mbajtje”, thekson policia.
Gjithashtu në Kaçanik është raportuar për rastin, ku bashkëshorti, ka shkaktuar dhunë ndaj bashkëshortes. Lidhur me rasti ende nuk është intervistuar i dyshuari. Rasti nën hetime.
