Presidenca e Kosovës ka reaguar ndaj një shkrimi të deputetit të zgjedhur të PDK-së, Artan Behrami që ka thënë se presidentja, Vjosa Osmani përmes shkëmbimit të letrave me BE-në ka vazhduar mandatin e EULEX-it, rrjedhimisht sipas tij, edhe të Gjykatës Speciale në Kosovë.
Këshilltari për media i presidentes, Bekim Kupina ka thënë se presidentja as nuk cakton as nuk vazhdon mandat të Gjykatës Speciale meqë kjo, thotë ai, është përcaktuar me amendament kushtetueses të votuar nga dy të tretat e votave të deputetëve.
Gjithashtu, ai ka thënë se presidentja ende nuk ka nënshkruar asgjë sa i përket mandatit të EULEX-it, edhe pse, thotë ai, është plotësisht në mandatin e saj ta bëjë një gjë të tillë, siç ka qenë njësoj, sipas Kupinës, në mandatin e presidentit Thaçi, kur ai ia vazhdonte mandatin teknik të EULEX-it, për mentorim, monitorim dhe këshillim.
“Deputeti Artan Behrami është mirë të mos shpifë. Presidentja as nuk cakton e as nuk vazhdon mandat të gjykatës speciale. Mandati i kësaj gjykate është përcaktuar me amendament kushtetues të votuar nga 2/3 e Kuvendit të Kosovës dhe ai nuk mundet as të ndryshohet e as të ndërpritet apo vazhdohet nga institucioni i Presidencës. Presidentja ende nuk ka nënshkruar asgjë sa i përket mandatit të EULEX-it, edhe pse është plotësisht në mandatin e saj ta bëjë një gjë të tillë, siç ka qenë njësoj në mandatin e Presidentit Thaçi, kur ai ia vazhdonte mandatin teknik të EULEX-it, për mentorim, monitorim dhe këshillim. Vazhdimi i mandatit të EULEX-it, është përcaktuar në Vendimin e Këshillit të BE-së të datës 5 qershor 2025, vendim ky që është publik”, ka thënë Bekim Kupina, këshilltar për Media i presidentes Osmani.
Reagimi erdhi pasi deputeti Behrami në një shkrim të tij në rrjete sociale shkroi se, Osmani vazhdoi mandatin e misionit të EULEX-it, pas padrejtësive, sipas tij, në Gjykatën Speciale e pa debat, duke e quajtur skandaloze.
“SKANDALOZE: Presidentja e Kosovës, Vjosa Osmani, përmes shkëmbimit të letrave me BE-në ka vazhduar mandatin e EULEX-it, rrjedhimisht edhe të Gjykatës Speciale në Kosovë. Këtë e ka bërë në mënyrë tinëzare, pa debat publik, në mënyrë të fshehtë. Ajo po e fsheh përmbajtjen. Vazhdimi i misionit të EULEX-it, pas padrejtësive në Gjykatën Speciale e pa debat, është skandaloz. Presidentja është dashur të negociojë vazhdimin e mandatit, të paktën me kusht që EULEX të marrë përsipër garancitë që kërkon Gjykata Speciale për lirim nga paraburgimi dhe mbrojtje në liri të krerëve të UÇK-së. EULEX është mekanizmi kryesor i Gjykatës Speciale në Kosovë”, ka shkruar ai.
