Të mërkurën bizneset do të protestojnë në Prishtinë për të kundërshtuar daljen në tregun e lirë energjetik. Bizneset kanë paralajmëruar protestë masive derisa kanë kërkuar shtyrje të vendimit për daljen në tregun e lirë energjetik.
“Prej orës 11:00 protesta do të filloj në sheshin Skendërbe. Bizneset janë duke u sfiduar nga ky vendim, nga 1 qershori janë duke u firnizuar nga KEK-u. Zyrtarët e KEK-ut thanë se për 60 ditë do ta furnizojnë biznesin me energji elektrike. Edhe KEK-u është sfiduar nga ky vendim. Ende kanë sfida logjistike për të gjetur se kush janë konsumatorët. Përkundër kësaj, ne kërkojmë nga qeveria që të reflektoj, ta ndihmojë biznesin, ta mbrojë qytetarin duke i dhënë edhe një mundësi për ta shtyrë një fazë kalimtare për tu përgatitur tregu dhe biznesi. Ka shumë biznese që nuk kanë marrë oferta. Është një shqetësim shumë i madh. Nuk është vullnet i yni për të protestuar. Por ZRRE nuk e ka përgatitur tregun, nuk ka sjellë shumë oferta”, ka theksuar Rafuna, raporton RTKlive.
Dalja në treg të lirë vlerësohet se do të ndikojë edhe në ngritjen e çmimeve
“Kjo protestë do të jetë protestë për ta kthyer vëmendjen tek publiku, te ZRRE dhe institucionet e Kosovës. Bizneset janë në hall, e do të jenë në hall edhe konsumatorët të cilëve do t’iu shtrenjtohen shërbimet dhe konsumi i tyre”, ka deklaruar kryetari i Aleancës Kosovare të Bizneseve, Agim Shahini.
Nga Dhoma e Tregtisë thonë se bizneset po përballen me oferta shumë të larta të furnizimit me energji elektrike.
“Nga 1,300 biznese vetëm 3 kanë arritur biznese me KEK-un. Bizneset nuk janë të kënaqura dhe i dijne pasojat e kësaj marrëveshje. Nëse arrijnë marrëveshje do të marrin çmimet e tregut që janë të paparashikueshme”, ka deklaruar kryetari i kësaj dhome, Skënder Krasniqi.
“20% të bizneseve e përbëjnë bizneset hoteliere. Tek takimi me KEK ishte një informatë befasuese. Është raportuar se diku 15-16 biznese kanë nënshkruar kontrata. Sot na informuan për tri”, ka shtuar Hysen Sogojeva nga Oda e Hotelierisë.
