Shkruan: Bajram MJEKU
Sot, kur pa asnjë bujë vendosa të shënoj ditëlindjen time, kuptova se paska ikur nga kjo botë, ish-kryeministri i Republikës së Kosovës në Ekzil dhe miku im i mirë, dr. Bujar Bukoshi.
Me Bujar Bukoshin, doktorin e mrekullueshëm dhe njeriun interesant, për herë të parë jam njohur në vjeshtën e vitit 1985. Atëbotë isha student i Filologjisë, kur një familjar imi ishte pacient i doktorit të ndjerë. E kujtoj si sot, kur baba i familjarit tim për të shpëtuar djalin e tij në Qendrën Klinike Universitare ku punonte dr. Bukoshi dhe pasi operacioni ishte i pashmangshëm, mori edhe një grusht parash me vete, thjeshtë t’ia jepte doktorit, i cili djalit të tij do t’ia shpëtonte jetën. E kujtoj si sot kur mbas operacionit, familjari im e tërhoqi doktorin tashmë të ndjerë për t’ia dhënë paratë, por kur doktor Bujar Bukoshi u zverdh në fytyrë dhe familjari im u zu ngushtë, ky i fundit iu drejtua doktorit:
– Parja e bardhë për ditë të zezë doktor!
– Ruaji paratë e zeza për ditë të bardha! – i tha doktor Bujari, derisa u nis për t’i shpëlarë duart mbas operacionit.
Duke dashur që familjarin tim ta nxirrte nga situata e pakëndshme, doktor Bujari i tha:
– Kur të përmirësohet shëndeti i djalit, do të vijmë në vendlindjen tuaj!
Kështu edhe ndodhi. Dy javë më vonë, dr. Bujar Bukoshi me kolegë të Klinikës ku punonte, na vizitoi në vendlindje dhe kjo është njëra nga vizitat që përjetësisht do ta ruaj në kujtesë.
***
Dr. Bujar Bukoshi, në rininë e tij ka patur jetë të rëndë, ashtu si shumica e brezit të tij, por që jeta e tij do të rëndohej edhe më shumë, ishin vitet gjashtëdhjetë kur vëllai i tij Hysen Bukoshi, do të dënohej me gjashtë vjet burg politik. Jeta e doktorit të ndjerë do të rëndohej edhe më, pasi tash ishte edhe mbajtës i familjes. Kur pas lirimit nga burgu, vëllai i tij Hyseni i vetëdijshëm se në Jugosllavinë komuniste, nuk do të të zinte as edhe një vend pune si mësues, në vitin 1969 vendosi të kalonte kufirin e hekurt dhe u largua ilegalisht në Shqipërinë staliniste. Më keq se në Jugosllavi, Hyseni pësoi në Shqipëri! Edhe atje sipas Kushtetutës së Shqipërisë staliniste dhe nenit famëkeq “për agjitacion e propagandë”, u dënua me hiç më pak se nëntë vite burg!
Me doktor Bujar Bukoshin jam takuar ditëve të para kur u themelua Lidhja Demokratike e Kosovës, por që brenda një kohe të shkurtër, si Kryeministër i Kosovës, u detyrua të vazhdonte aktivitetin e tij politik, prandaj sa herë tash e më shumë se tre dekada përmendim emrin e tij, është i pashmangshëm edhe togfjalëshi “Kryeministri në ekzil”.
Ia kam thënë për të gjallë, se më shumë se politikan, doktori ishte njeri pragmatik. Më kujtohet si sot kur në Tiranë gjatë periudhës së okupimit më pat thënë:
– Si është e mundur që të paktën tabelat e rrugëve në qytete të Kosovës të mos shkulen, derisa mbajnë emrat e tiranëve serbë, të cilët kanë masakruar mijëra shqiptarë gjatë këtij shekulli në Kosovë?!
***
Lamtumirë dr. Bujar Bukoshi! Kësaj radhe shkruajta sa për të të kujtuar, por nëse i lumi Zot na ka falur edhe ndonjë vit jetë, do të shkruaj më gjatë për themeltarët e partisë së parë pluraliste në Kosovë, do të shkruaj edhe pë Ty dhe për shumë ngjarje që nuk janë thënë deri tash, por që ia vlen të thuhen…
