Policia e Kosovës njofton se më 10 qershor ka arrestuar tre persona të dyshuar për mashtrim, të cilët dyshohet se kanë mashtruar dhjetë gra ish-pjesëmarrëse në luftërat në Siri dhe Irak.
Në njoftimin e Policisë thuhet se sipas hetimeve, të dyshuarit kanë premtuar donacione për integrimin e viktimave në shoqërinë kosovare, por në vend të donacioneve, viktimat kanë nënshkruar kontrata kredie në një institucion mikrofinanciar në Prishtinë, me vlera nga 4,500 deri në 5,000 euro.
Njëri nga të dyshuarit (R.D.) ka identifikuar viktimat dhe i ka dërguar në institucion për aplikim, ndërsa dy të tjerë, (V.G.) dhe (A.H.), kanë përgatitur dhe aprovuar kontratat e kredive në institucionin financiar.
Pas nxjerrjes së mjeteve në llogaritë bankare të viktimave, paratë janë tërhequr nga i dyshuari R.D., i cili u ka dhënë viktimave vetëm pjesë të vogla dhe pjesën tjetër e ka përvetësuar duke pretenduar pagesa për zyrtarët që kryenin shërbimet.
Dëmi i shkaktuar kap vlerën rreth 45,000 euro. Dy nga të dyshuarit janë ndaluar për 48 orë, ndërsa i treti është liruar në procedurë të rregullt. Hetimet vijojnë nën mbikëqyrjen e Prokurorisë Themelore në Prishtinë.
